Masacre en Madrid

Esta mañana, ente les 7 y media y les 8, cuatro bombes españaben nun espaciu de cinco minutos n'otros tantos vagones de tren de cercaníes en Madrid, causando una hecatombe que ye la mayor de la historia nun atentáu en toa España. El recuentu de muertos yá pasa de les 170 persones y pue xubir en cuantes qu'hai 400 persones con mancadures de diversa gravedá. L'autoría del atentáu múltiple ta entovía ensin reivindicar, pero'l Gobiernu atribúyelos a la banda terrorista ETA

Les bombes diben en vagones de trenes de cercaníes de la llinia 2 del serviciu de rodiaes de Madrid, y españaron a l'altura del barriu de Pozo del Tío Raimundo, na estación de Santa Eugenia y na estación central d'Atocha, onde taben puestes cinco bombes y que foi onde más graves foron los daños. La policía arreventó dempués dellos paquetes bomba, que, afortunadamente, nun causaron dañu. El primer recuentu oficial falaba de 29 muertos n'Atocha, 18 nel Pozo del Tío Raimundo y 15 en Santa Eugenia, lo que facía un total de 62 víctimes mortales, pero a les 11:45 de la mañana yá hai oficialmente 173 fallecíos. El númberu de víctimes foi mayor por ser primer hora de la mañana, hora d'entrar al trabayu, cuando los vagones van cargaos de xente, y por nun haber avisu de la presencia de les bombes. El Ministeriu del Interior entovía nun dispón de la identidá de los fallecíos n'internet, pero hai un teléfonu d'emerxencia al traviés del 112 pa quien suponga que puea tener un familiar ente los fallecíos.

La situación en Madrid ye caótica, con tol centru ciudá atacáu d'ambulancies y servicios de seguridá, que nun dexaron pasar de mano a delles ambulancies a la zona d'Atocha por mieu a qu'hubiere más bombes ensin accionar. Los tresportes nun funcionen, y RENFE tien suspensos bien de trenes. El Serviciu d'asistencia SAMUR tien montáu un dispositivu d'emerxencia y un hospital de campaña xunta la estación d'Atocha, y la Cruz Encarnada tien iguáu un dispositivu pa quien quiera donar sangre