Más protestes contra la mina d’oru de Balmonte

Dempués de le denuncies de la Coordinadora Ecoloxista Asturiana y l'asociación Ecoloxistes n'Acción, l'Asociación Asturiana d'Amigos de la Naturaleza (ANA) tamién unvió la so denuncia particular contra les obres que quier entamar la empresa Río Narcea Gold Mines consistentes nun segundu embalse pa basa contaminao.

Amigos de la Naturaleza Asturiana llama l'atención sobre'l fechu de que'l llugar onde la empresa quier poner el depósitu de basa ye precisamente onde, acordies colos planes orixinales de restauración de la mina, tendría de dir un llagu artificial. El profesor de la Universidá d'Uviéu Carlos Lastra echa mano nes alegaciones d'ANA de los documentos d'impactu ambiental colos que s'autorizó nel añu 1995 l'aniciu de la mina, y remembra que nellos falábase d'un horizonte d'esplotación a nueve años qu'agora ta superáu dafechu ensin que se dea una situación de recuperación del entornu, alcontrándose en cuenta d'ello la mina en fase d'espansión. El fechu de que la planta de tratamientu del mineral, que se permitió pa que procesare la producción de la mina asturiana, procesa tamién dende l'añu pasáu mineral que vien d'una mina d'oru en Groenlandia, onde la llexislación local nun da permisu pa plantes de tratamientu por cianuración.