Más perres pal fútbol en véspora del derbi

Esti fin de selmana xuégase n'El Molinón l'últimu derby del añu ente Sporting y Uviéu. El partíu llega colos dos equipos abeyando pela parte media-alta de la tabla y col ascensu a primera como obxetivu, pero los dos grandes del fútbol asturianu tamién lleguen al partíu más sicolóxicu del añu coles cuentes feches una llaceria, y ye que Sporting y Uviéu arrastren unes crisis morrocotudes de les que cuenten con salir con ampliaciones de capital y tamién col sofitu del Gobiernu asturianu. Nel añu 2.000, el Gobiernu asturianu firmó un alcuerdu colos dos grandes del fútbol asturianu. A cambiu de llevar propaganda institucional, Sporting y Uviéu llevaron caún 200 millones de pesetes por un patrociniu a cuatro años. Énte l'abegosa situación económica que tan pasando les dos Sociedaes Anónimes Deportives, el Principáu ta preparando un alcuerdu nuevu de patrociniu, per un importe asemeyáu y que se xuntaría al que yá ta funcionando.

Sporting y Uviéu recibieríen asina 400 millones de pesetes en dos años del Principáu, a los qu'hai qu'axuntar en casu del Sporting, los 2.000 millones de pesetes en que-y compró'l Conceyu de Xixón les instalaciones de Mareo.