Más osos de los que se contaba

Un estudiu del CSIC descubre que la población asturiana d'osos ye mayor de lo que se contaba, pero l'altu índiz de cosanguinidá de la especie fai peligrar la so continuidá.

L'estudiu del CSIC fechu en collaboración col Principáu d'Asturies descubre que'l censu actual d'osos n'Asturies ye d'un total de 107 exemplares, una cantidá a la que los científicos del CSIC llegaron dempués d'analizar un total de 900 muestres d'escrementos a les que se-yos sacó l'ADN p'apautar el númberu d'osos distintos a les que pertenecíen. L'estudiu aporta datos positivos sobre la situación de la especie,como ye'l fechu de que la población xube respective a estimaciones d'otros años, pero aporta tamién una solombra, y ye que la variabilidá xenética del osu n'Asturies ye la más baxa del mundu sacantes la de los osos de les Islles Kodiak n'Alaska. Ello pue llevar a que nazan menos esbardos y tamién a que tengan más enfermedaes y tares por culpa de l'alta cosanguinidá.

Por ello los científicos del CSIC creen que ye preciso meyorar les conexones ente los grupos oseros del oriente y del occidente, pero ello va ser difícil, en cuantes qu'amás de les resquiebres qu'apauten l'autovía nel Va.le Güerna y la rampla del tren en Payares agora van facese estaciones d'esquí como la de Puirtu Braña n'Ayer que van torgar el pasu de los osos. Otramiente, la rellación ente machos y femes ta desequlibrada enforma, con dos osos por cada osa. Ello pue suponer tamién un problema, en cuantes que los machos ataquen dacuando a los esbardos.