Más d'un millón d'euros nes subvenciones a la promoción del asturianu

El Director de la Oficina de Política Llingüística Ramón d'Andrés presentó ayeri xunta Luis Casteleiro, ún de los técnicos del so departamentu, la convocatoria de subvenciones pa la promoción del asturianu del 2005.

Estremaes en diez llinies de subvenciones distintes, esta convocatoria supón un total de 1.083.395 euros, una cifra que según sorrayó Ramón d'Andrés supón un incrementu sustancial de la dotacion global de les subvenciones respective al exerciciu 2004. D'Andrés cifró esta xuba global en más del 50% respective al exerciciu anterior y llamó l'atención especialmente sobre la partida acutada pa la normalización en medios de comunicación y la empobinada a la normalización nel ámbitu de los conceyos, qu'esperimentaron una xuba del 109%. Según Ramón d'Andrés, nes bases de la convocatoria apaecen claramente diferenciaos asturianu y gallego asturianu y afínase muncho mas al especificar los criterios de lo que s'entiende por normalizacion.

Luis Casteleiro sorayó la idea de que se perfilen muncho más los criterios normalizadores a los que s'empobinen estes subvenciones y aclarió delles diferiencies respective a otres convocatories. Asina ye que por exemplu despaez la llinia empobinada a la traducción al castellanu d'obres n'asturianu por tener mui poca aceptación , mientres que per otra parte créase una llinia específica de subvención a la creación lliteraria que va dirixida específicamente a los autores. Otres llinies de subvención siguen un lóxicu progresu, como ye'l casu de la empobinada a la creación de llibros de testu pa la enseñanza del asturianu, na que va seguir trabayándose nos llibros pa ESO pero cola mirada puesta yá en que se faigan otros pa bachiller na próxima convocatoria.

En total son 10 les llinies de subvención les qu'igüen esta convocatoria 2005 de la conseyería pa la normalización del asturianu y del gallego-asturianu, y estrémense como vien darréu (conséñase ente paréntesis la diferiencia respective al 2004:

-A asociaciones y entidaes ensin ánimu de lucru: 43.000 euros (+1000)
- A particulares y asociaciones p'actividaes de cine y vídeo: 20.000 euros (+2.000)

- A conceyos pa la normalización: 168.879 euros (+43.677, anque s'anuncia que ta en trámite una partida que lleve la cantidá total a los 313.374 euros, coloque'l total de les subvenciones pondríase en 1.083.395 euros)

- A empreses particulares: 60.000 euros (+11.119)

- A estudios fechos en o sobre l'asturianu o'l gallego-asturianu: 12.000 euros (-103)

- Pa la promoción del llibru n'asturianu o gallego-asturianu: 190.000 euros (+5.879)

- A medios de comunicación: 380.000 euros (+67.473)

- Pa la promoción de la música: 30.021 (llinia de nueva creación)

- A la edición de libros d'enseñanza: 20.000 euros (+1.000)

- Pal fomentu de la creación lliteraria: 15.000 (llinia de nueva creación)