Más de 160 clicks, vehículos y edificios componen un diorama sobre les movilizaciones de Naval Xixón

Dos hores y media lleva’l montaxe del diorama de Pixi sobre les movilizaciones de Naval Xixón qu’estos díes va poder vese na xixonesa Sidrería Canteli. Compuestu por más de 160 muñecos de Playmobil, dellos vehículos y edificios, ocupa un espaciu de cuasi 5 metros de llargor y va inaugurase nun actu con presencia de Xune Elipe.

El cantante de Dixebra va ser el convidáu especial de la inauguración de la esposición d’una obra tres la qu’hai años de trabayu. Un tiempu nel que l’autor, conocíu como Pixi, pudo dir faciéndose colos clicks, nome de los populares muñecos de Playmobil, y dar forma a esta representación na que tamién collaboró Antón, cola cesión de pieces importantes como’l barcu pa los soldadores, y Milio nel montaxe.

En total son más de 160 clicks, 3 furgonetes policiales, 1 ambulancia, 2 grúes y 1 barcu. Amás represéntase una comisaría, un bancu y un chigre.

A les 20 hores d’esta tarde va tener llugar l’actu d’apertura, nel qu’Elipe va falar de ‘Ente la niebla’, el discu-llibru de Dixebra, trabayu últimu de la banda que ta acabante de ver la lluz, con un tema ‘El Natahoyo’, dedicáu a la llucha protagonizada polos trabayadores del astilleru Naval Xixón, asitiáu nesti barriu xixonés, en defensa de los puestos de trabayu. El diorama que pretende recordar eses movilizaciones va siguir espuestu nel chigre de la cai Almacenes hasta’l xueves nel so horariu habitual.