Más de 1.000 alegaciones contra l'Autovía del Sella

Ayeri acabó'l primer plazu de presentación d'alegaciones contra l'Autovía del Sella, un proyectu del Ministeriu de Fomentu que cuenta col aval personal del Ministru Álvarez Cascos y que tien enfrentao a la xente y a bien de partíos políticos y asociaciones de los conceyos pelos que pasa, sobremanera en Parres, que sedría'l más dañáu pola carretera y d'onde salieron más escritos de protesta. En cuantes a los sofitos políticos a l'Autovía, mientres el PP defende la obra, el PSOE de Parres, que manda con absoluta, ye contrariu dafechu a ella, una posición en que taba tamién tol partíu hasta va dos selmanes, en que la FSA tornó d'opinión pa xuntase al PP y ponese al favor de l'Autovía.

Les alegaciones vienen lo mesmo de particulares que d'asociaciones de vecinos, partíos políticos, asociaciones ecoloxistes o la Plataforma d'oposición a l'autovía y les más d'elles vienen a coincidir en dellos argumentos que son los que más se repiten. Ente ellos rescampla'l dañu de la carretera a la cuenca del Sella, a la puerte del parque de los Picos d'Europa, un espaciu que ta acabante d'entrar na rede de Reserves Mundiales de la Biosfera de la UNESCO. El Colectivu Montañeru pola Defensa de Los Picos remachó sobre esti particular, declarando que l'autovía lo que pretende ye masificar la parte de Los Picos.

Esti argumentu, que defenden sobremanera los grupos ecoloxistes como la Coordinadora Ecoloxista d'Asturies encóntase n'otru que vien a negar la falta d tala autovía, y ye que cola entrada en funcionamientu de l'autovía del Cantábricu, el cachu de la carretera n-634 que se quier convertir n'autovía yá nun lleva la carga de coches que soportaba hasta agora. Los cálculos qu'acompañaben el proyectu mándense de datos de tráficu anteriores a l'apertura d'esta nueva autovía. D'otra banda, pa munchos de los qu'aleguen ye dificil de pasar la necesidá d'una autovía de 19 kmts pa dar serviciu a una zona en que viven sobre 10.000 persones.

Otramiente, la promesa ministerial de que l'autovía nun va vese porque lo más d'ella va dir enterrao tampoco nun se recibe con muncha aceptación, en cuantes que los túneles y movimientos de tierres puen modificar y dañar tola rede hidrográfica de la fastera, que ye complicada enforma.

Al paecer, según dixeron segun dellos representantes, el plazu p'alegar, que teorícamente remataba ayeri, va siguir abiertu hasta'l 14 de xunetu, polo qu'entovia habría tiempu pa qu'esta rempuesta popular medrare en forma de nuevos escritos contra esta carretera que pasaría al par del Ríu Sella.