MAS Corvera va presentar el so candidatu a l’alcaldía esti martes

La formación asturianista nueva de calter llocal, MAS Corvera, va presentar esti martes al so candidatu a l’alcaldía del conceyu. Va ser nel trescursu del I Congresu Llocal del partíu, abiertu a tolos vecinos.
 
L'actu, que va principiar a les 16.30 hores nel aula polivalente del Centru Social de Les Vegues, va consistir nuna esposición del proyeutu a cargu del secretariu xeneral, Xicu Mata, y a la presentación del candidatu a l'alcaldía por MAS Corvera. Esta formación nueva defínese como “un partiu políticu de calter llocal inspiráu nos principios de la democracia social, los derechos humanos y de los pueblos, el desendolcu caltenible y la defensa del mediu ambiente, la xusticia, la paz y la solidaridá internacional”.
 
L’agrupación diz asumir como propia la hestoria y aportación del socialismu democráticu, na defensa de los drechos de los más desfavorecíos y na llucha pola construcción d'una sociedá más xusta y igualitaria, “apostando por mecanismos de participación ciudadana, como lo ye la democracia participativa”. L’oxetivu de MAS Corvera ye ser una alternativa a los partíos políticos tradicionales.