Más ayuda contra'l fueu

El Gobiernu asturianu ta acabante de mercar trés máquines del modelu B3, que se tien pol meyor del mundu nos llabores de matar el fueu en monte. Capaces de cargar 1.000 llitros d'agua en venti segundos, estos helicópteros de la casa Eurocopter (Grupu EADS) vuelen a 230 kilómetros a la hora y van permitir intensificar les xornaes de los equipos, que van poder tar nel aire un 30% más de tiempu. Anque esta marca nun-yos va valir de muncho n'Asturies, da una idea de l potencia y l'aguante de les máquines el fechu de que'l modelu B3 ta cabante de valtar la marca d'altura pa un helicópteru al llegar a los 8.000 metros d'altura nel Everest.

Na presentación de los aparatos, que se van coordinar con una avioneta nueva de reconocimientu, el conseyeru de Seguridá Javier Valledor Valledor remembró que'l fueu prende casi siempre por causes humanes y congracióse del sofitu que tan alcontrando na sociedá a les midíes nueves sobre incendios.

Les máquines nueves lleguen dempués de que'l fueu abrasare n' Asturies el mes de xunetu 312 hectárees, un terciu aproximadamente de les mesmes de biesca y les demás de rozu, matos y praos. Ello supón cerca del doble que xunetu del 2004, cuando'l fueu quemó 177 hectárees. La seca y l'alta temperatura tan tres d'ello.