Martino cuenta la historia d’Alfonso II el Castu en ‘Vincitur inimicus’

|
Cubierta 'Vincitur inmicus' de Xandru Martino

A mediu camín ente la realidá y la ficción, Xandru Martino narra y imaxina la historia d'Alfonso II el Castu al traviés de los güeyos de Pelayo, un monxu amanuense que conoz al rei nel so retiru n’Ablaña, en 'Vincitur inmicus'. Ye la segunda novela p’adultos del ribeseyanu depués de ‘Nunn’, contestualizada na invasión romana d’Asturies.

“El procesu de montar una novela histórica tien dos partes que me presten”, esplica l’autor, “primero hai que se documentar y dempués hai que montar la novela en sí. El procesu de documentación foi llargu, pero nun foi tan cafiante como con ‘Nunn’ –el so anterior llibru históricu, ambientáu nel sieglu I d.C.– , porque hai mui pocos documentos del tiempu de ‘Nunn’”. Nesti casu apunta que “cuanto más averada a nós ta la hestoria, más testos hai, masque d’Alfonsu nun se sabe siquiera si taba casáu, y a veces nun sabes a qué palu averate. Yo suelo escoyer el que más xuegu da pa la hestoria», diz Martino, qu’imaxina una reina con personalidá y remangu.

Rei en dos periodos distintos, “Alfonso II tornó al tronu nel 791 pa retirar de nueves, esa vegada pa un monesteriu, hasta recoyer les brides del reinu nel 808. Foi entós cuando afitó’l so poder y el d’Asturies, camudando nún de los reis más influyentes del so tiempu, anque la so figura sigue envuelta na borrina y la lleenda”, apunten dende la editorial Delallama.

Coles cróniques alfonsines perdíes, Martino punxo la so reescritura en manes d’un personaxe ficticiu, Pelayu, “un monxu que se convierte nel contrapuntu perfeutu del rei y, quiciabes, nel protagonista verdaderu del llibru”. Pelayu representa’l cristianismu humanista, alloñáu davezu de los cabezaleros de la Ilesia, o, como diz l’autor, “Pelayu ye una bona persona”.

“El monxu, atrapáu pol deber y les tensiones de poder ente cristianos –d’Asturies y fuera– y musulmanes, va desendolcando’l so llabor enantes de cada capítulu, pente una trama con pequeños saltos temporales qu’acaben confluyendo nel presente de la novela. Too ello dende un reinu ampliu, que s’estendía dende lo qu’anguaño ye’l norte de Portugal hasta Euskadi, pasando per Galiza, Lleón o Cantabria”, esplica la editorial.

500 exemplares vendíos de ‘Nunn’

‘Vincitur inimicus’ ye la segunda novela p’adultos de Martino depués de ‘Nunn’, asoleyada nel 2020. “Tanto la editorial como yo tamos mui contentos con ‘Nunn’, porque calculo que se vendieron unos 500 exemplares hasta agora, y vendelos nuna novela n’asturianu nun ye fácil”, rescampla l’académicu.

Un ésitu qu’espera repetir con esta “hestoria d’amistaes, enemistaes y tensiones polítiques nuna corte na que los intereses personales arreblaguen penriba d’otros valores”, resume Delallama.

Contador Estadistiques