Martínez Oblanca torna a sentase na Comisión Direutiva de Foro

El diputáu de Foro nel Congresu, Isidro Martínez Oblanca, normaliza rellaciones colos órganos del partíu. El sábadu dio una rueda de prensa xunto col secretariu xeneral, Adrián Pumares, sobre la robla de l'Allianza pola Industria, na que confirmó que va volver a sentase na Comisión Direutiva de la organización tres meses d’ausencia.

D’esta forma’l xixonés cambia dafechu la so posición con respeuto a la que caltenía hai poques selmanes atrás hacia la direición de Carmen Moriyón. Cercanu a Francisco Álvarez-Cascos, fundador de Foro col que’l partíu tien en marcha un procesu xudicial, un aconceyamientu recién cola ex alcaldesa de Xixón permitió que les agües tornen al so calce.

La imaxe de la normalidá na formación diose’l sábadu, nuna rueda de prensa en Xixón xunto con Pumares pa valorar el documentu de l’Allianza pola Industria robláu por tolos partíos de la Xunta Xeneral cola esceición de Podemos pa unvialu al Gobiernu estatal. “Sólo será útil si vien acompañáu del compromisu firme de los diputaos asturianos nel Congresu. Mientres que la nuesa industria nun fai más qu’unviar señales d’alerta, la vicepresidenta cuarta Teresa Ribera sigue imparable na so cruzada pa convertir el Principado de Asturias nun desiertu verde pa fines de selmana”, apuntó’l voceru nel Parllamentu asturianu.

“Ye cuestión d’emergencia que s’adopten les midíes que reclama la industria asturiana p’asegurar la so competitividá, caltener l’emplegu y crear trabayu”, añadió Martínez Oblanca. Dambos coincidieron en que Foro ye “l’únicu partíu del Principado que tien capacidá política pa defender lo mesmo na Xunta Xeneral qu’en Madrid y l’únicu partiu que pue ofrecer el compromisu de que los sos cargos eleutos tengan esclusivamente l’interés d’Asturies nel centru de la so actividá”.

Na semeya, Pumares y Martínez Oblanca.