Martín diz que dexa Mediu Rural con una “satisfaición moderada”

El conseyeru de Mediu Rural y Pesca, Aurelio Martín, fixo un balance sobre’l so llabor nestos dos años y mediu de llexislatura. Asegura que marcha con una “satisfaición moderada y “pudiendo mirar a la cara a tol mundu”.
 
Martín, que garró la conseyería tres el pautu de gobiernu que robló IX-BA-LV col PSOE a finales del 2008, destacó que tanto él como’l so equipu fixeron “tolo posible” por impulsar el mediu rural asturiano y averalu a la ciudadanía. “Hai dos años y mediu quixi poner en valor el mediu rural asturianu y afianzar l’alianza colos ciudadanos”, comentó pa depués remarcar la calidá, seguridá y sostenibilidá de la producción agraria, ganadera y pesquera asturiana.
 
Por último, el políticu d’IX dixo que “aspira” a que, depués del protagonismu que tolos candidatos dieron al mediu rural na campaña eleutoral, “siga falándose” del sector y les sos necesidaes tres la constitución del parllamentu asturianu y el Gobiernu d’Asturies. Martín, númberu 3 de la llista d’IX-LV a la Xunta Xeneral, lo que-y permite repetir nesta llexislatura, fixo estes declaraciones n’Uviéu tres participar na presentación de la 'Coaguía 2011’. Esta espublización trátase una guía de servicios pa los profesionales del sector agrariu.