Martín apunta que la esportación de sidra asturiana ye 20 veces superior a la vasca

El conseyeru de Mediu Rural y Pesca del Gobiernu Asturianu, Aurelio Martín, ufiertó datos, según los que, nos dos últimos años y mediu, la sidra asturiana esportóse por valor de 3.800.000 euros a 32 países.

El conseyeru de Mediu Rural y Pesca del Gobiernu Asturianu, Aurelio Martín, ufiertó datos, según los que, nos dos últimos años y mediu, la sidra asturiana esportóse por valor de 3.800.000 euros a 32 países.

Amás añadió que la vasca, nel mesmu periodu algamó la cifra de 198.000 euros, ye dicir casi 20 veces menor.
  
Con estes cifres, el responsable autonómicu quiso apagar los ecos del discutiniu surdíu nos últimos díes, dempués de que medios internacionales, dellos especializaos y otros xeneralistes como'l diariu inglés 'The Guardian' o l'estadounidense 'The New York Times', allabaren la sidra vasca y nun mentaren l'asturiana.
  
Martín ofreció güei una rueda prensa, acompañáu pol presidente del Conseyu Regulador de la Denominación d'Orixe Protexida (DOP) Sidra d'Asturies, Victor Manuel Escalada, pa defender los datos d'esportación, asina como les inversiones en promoción y modernización que se tán realizando nesta comunidá.
  
"La sidra asturiana ye más asturiana y internacional que nunca. La denominación d'orixe protexida creció un 20% nel últimu añu, y nos dos últimos años y mediu esportamos por valor de 3.800.000 euros a 32 países del mundu", señaló. De siguío, comparó: "les esportaciones del País Vascu, nesi mesmu periodu, suben a 198.000 euros". "Éstos son los datos y lo demás son especulaciones maneres que perxudiquen al sector", afirmó atayante.
  
Preguntáu pol valor que-y atribuyía a les informaciones de medios internacionales, foi directu: "el qu'ustedes quieran dar". "Yo doi datos y de vez en cuando lleo nuna páxina web qu'un señor pásiase per España y el País Vascu, confunde sidreríes con llagares, y diz qu'hai bien bon bacaláu neses sidreríes". "Nun puen comparase les inversiones públiques y los datos d'esportación con que señores que visiten el nuesu país lleguen a conclusiones determinaes", añadió.
  
Asina, reseñó otros datos como los 234.971 euros destinaos a la promoción de la Sidra d'Asturies mientres los últimos trés años, los 5.127.679 euros destinaos a la meyora y modernización de los llagares, les inversiones en materia de derivaos de la mazana o la celebración de la segunda edición de la feria Sicer, con un costu de 355.000 euros.
  
"Saldríamos más baratu", defendió'l conseyeru, "convidar a estos señores a pasar una selmana n'Asturies visitando llagares, qu'a invertir y promocionar na modernización de los nuesos llagares".
  
Amás, Escalada cifró'l crecimientu del 20% añal na DOP Sidra d'Asturies, concretando les contraetiquetes xeneraes nel 2007 en 697.000, nel 2008 en 760.000, nel 2009 en 1.099.000 y nel 2010 en 1.195.500 con previsión de llegar al 1.300.000, "tou un récor pa la Denominación".
  
Nesti puntu, tomó la palabra Escalada, que se refirió a "los pocos recursos que tenemos pa la promoción". "Ye difícil facer una promoción internacional, cuando los datos esistentes de ventes internacionales son realmente risibles; invertir allá onde nun tas presente ye tirar el dineru", añadió.

La dop nun tocó techu" n'Asturies y Madrid
Martín señaló que la marca DOP Sidra d'Asturies ta creciendo a un 20%, pero "tovía nun tocó techu". "Tovía tenemos que vender muncha sidra DOP n'Asturies y en Madrid", señaló.
  
Según Escalada, el Conseyu entiende que "lo que tenemos de facer ye que los mesmos asturianos distingamos sidra DOP de lo que nun lo ye, porque esos asturianos van ser prescriptores fuera de la nuesa rexón". "La mayoría de los profesionales y públicos xeneral tienen un desconocimientu total de la sidra DOP", polo qu'apoyó incidir nesta cuestión "antes de dir a esos mercaos internacionales, onde nun ta presente la sidra d'Asturies" y sí "esa sidra espumosa de tola vida que nun mos va a dar la distinción de calidá".

Treslláu de Sicer a Madrid
Sicasí, Martín mostróse favorable a buscar nueves estratexes de promoción internacional, llabor pal que s'enfotó na entidá Asturex, como instrumentu autonómicu de coordinación pa les esportaciones n'Asturies.
  
Sicasí, señaló como primer midida concreta'l posible treslláu de la feria Sicer a Madrid, aspectu que ta negociándose col subsecretariu del Ministeriu d'Agricultura y ex conseyeru del cargu n'Asturies, Santiago Menéndez de L.luarca. Preguntáu poles razones d'esti movimientu, esplicó qu'en primer llugar "en Sicer 2009 hubo sidres d'otros países y otres zones promocionándose n'Asturies".
  
Per otra parte, consideró que la feria en Xixón "tien una relación costo-efectividá dudosa". "La rentabilidá podría ser meyorable fuera d'Asturies y podría dase esi contestu internacional, pero amás Madrid significa l'escaparate más importante pa los productos d'alimentación", previó.