Marqués alcuentra semeyances "na forma" cola crisis del 98 nel PP

L'ex presidente del Principáu Sergio Marqués señaló que la situación que vive'l PP asturianu nesti momentu, tres la baxa del ex ministru de Fomentu Francisco Álvarez-Cascos, páezse a la crisis que vivió'l partíu n'Asturies en 1998.

Sicasí, apuntó que se d'una semeyanza "na forma y non nel fondu", según señaló Marqués, en declaraciones a Europa Press.
  
Precisamente esti llunes, l'actual presidente del partíu n'Asturies, Ovidio Sánchez, comparó la situación que travesó'l partíu naquel momentu cola actual, al detectar, según dixo, los mesmos síntomes.
  
Sicasí, pa Marqués, existen "diferencies importantes" ente un procesu y otru. "A mi espulsáronme del partíu nel so momentu", algo que nun asocede nesti momentu con Álvarez-Cascos, que marchó voluntariamente "poles razones que seyan".

Marqués recordó qu'hasta que nun recibió la espulsión del partíu nun fizo nengún tipu de movimientu en relación a la creación d'un nuevu partíu, lo que sería la Unión Renovadora Asturiana (URAS). "Fízose cuando yá pasara too, incluyida la moción de censura; hasta esi momentu yo nun moviera nin un solu deu", esplicó.
  
"Nun pue comparase una situación na qu'a mi m'espulsen con otra na qu'alguién marcha voluntariamente del partíu", calcó l'últimu presidente del PP que tuvo Asturies.
  
No que sí tienen aspectos asemeyaos y hasta "idénticos", ye en tolo que se refier a la forma. "Dícenlo dellos refranes, que "aunque la mona se vista de seda, mona se queda", o "por el hábito se conoce al monje", comentó. Asina, faló de paecencies na mecánica, "a los silencios de Madrid", la existencia de pliegos de firmes o vinculaciones de cargos electos.
  
Preguntáu sobre si aquella firida de 1998 nel PP asturianu llegó a zarrase o sigue tovía abierta, Marqués recordó la frase que pronunció Cascos diciendo que prefería un partíu sin gobiernu qu'un gobiernu sin partíu. "Aquello costó'l Gobiernu y agora, la mesma persona que lo dixo tendría qu'esplicar si yera una bobada o si lo que ta faciendo agora, que ye una contradicción colo que dixo entós, ye en realidá una rebexina", dixo. "O yera una babayada cuando se dixo esa frase o esto d'agora ye una rebexina", resumió.
  
Nuevu partíu
No referente a la posibilidá de que Cascos ponga en marcha un nuevu partíu políticu n'Asturies, Marqués dixo que si alguién quier faer algo d'esi tipu ha realizase "dende un convencimientu bien firme" y recordó el "trabayu" que-y costar a él montar URAS.
  
"Lo que yo nunca entendí ye que vaya buscase un resultáu electoral siendo contrariu a algo o dende un movimientu reflexu porque nun se-y fizo casu", comentó.
  
Guiños asturianistes
A lo último, no referente a los guiños casi asturianistes que realizó Cascos esti domingu, denominando "país" a Asturies, Marqués señaló que si l'ex ministru abandona un partíu políticu "sin dar más esplicaciones que dicir que nun-y ficieron casu, con algo tien que vistir esi santu... Porque pa ser un PP 'bis' nun sería razonable", apuntó.