Mariano Rajoy avisa que “pronto” va haber nueves midíes “difíciles”

Ensin citales, Mariano Rajoy anunció la llegada de midíes económiques “difíciles”. Va ser “pronto, a lo llargo d’esti añu”, según adelantó’l presidente del Estáu a los empresarios presentes na Asamblea Xeneral de la CEOE.
 
Estes midíes "nun van tener más oxetivu, por difíciles que sían", que procurar la medra de la economía y la creación d'emplegu”, apuntó Rajoy, pa depués añadir que "éstos son tiempos de grandes decisiones. Vamos tener que tomar munches nes feches próximes, pero la principal yá la tomamos: correxir lo qu'haya que correxir y reformar lo qu'haya que reformar". Nesi sen, agradeción a la ciudadanía "la entereza y solidaridá" cola que ta enfrentando la crisis.
 
Mientres la so intervención nesti actu de la Confederación Española de Organizaciones Empresariales (CEOE), el presidente estatal nun entró en más detalles sobre qué grandes decisiones "difíciles" va tomar el Gobiernu español a plazu curtiu y centró'l so discursu n'Europa y na necesidá de que les sos Estaos miembros y el Conseyu Européu que se celebra esta selmana llancen el mensaxe de que l'euru ye un proyeutu "irreversible". Nel so discursu, malpenes fixo mención al rescate a la banca que'l Gobiernu español pidió güei de manera formal al Eurogrupu y llendóse a recordar les cifres ofrecíes por Oliver Wyman y Roland Berger nes sos evaluaciones, hasta 62.000 millones d'euros, nel escenariu más "altamente improbable", en pallabres de Rajoy.
 
Indicó que les entidaes tendrán que facer un esfuerzu importante por recapitalizase y, recordó, que "si nun lleguen por sí mesmes", l’Estáu cuenta con "los sos socios europeos", que de la mesma tamién van pidir "esfuerzos" a les entidaes que reciban eses ayudes.   "La finalidá d'esti exerciciu ye acabar cola rocea nos mercaos y llograr que'l creitu llegue a families y empreses", sorrayó'l presidente, qu'insistió en que "nos díes más difíciles, les inestabilidaes formen parte inevitable de la salida de la crisis".