María Fernández Álvarez sustitúi a Carcedo como senadora pola Xunta

La miembru de la Executiva de Pedro Sánchez abandonó l'escañu tres ser el so nomamientu como Alta Comisionada del Gobiernu estatal de Llucha contra la Probeza Infantil.

La Federación Socialista Asturiana (FSA) escoyera a María Fernández Álvarez pa sustituyir a María Dolores Carcedo y nel Plenu celebráu ayeri la Xunta Xeneral aprobóse qu'ún de los dos senadores que-y correspuende al Parllamentu asturianu fora pa socialista. L'otru ye'l popular Fernando Goñi.

"Toi arguyosa, contenta y con gran responsabilidá d'asumir un retu nuevu y, dende la cercanía y el contautu direutu col territoriu, intentar responder a los intereses de la ciudadanía d'Asturias", espresó Fernández Álvarez. L'alcaldesa de Llangréu ente 2012 y 2015, y actual secretaria del área de Cohesión y Derechos Sociales de la FSA, añadió que "siempre ye una gran responsabilidá sustituyir a la nuesa compañera Luisa Carcedo, que desempeñó un llabor importante como senadora".

Seis representantes

Asturies cuenta con un total de seis representantes nel Senáu, cuatro salíos de les urnes y dos por designación de la Xunta Xeneral. Amás de Fernández Díaz y Goñi tienen escañu na Cámara Alta Mario Arias y Ovidio Sánchez, pol Partido Popular (PP); Rosa María Domínguez de Posada, por Foro; y l'ex presidente del país Vicente Alberto Álvarez Areces, pola FSA.

Na semeya, Fernández Álvarez xunto con Adrián Barbón, secretariu xeneral de la FSA.