Marea prieto en Xixón

Tres la visita del galipote del Prestige, la costa asturiana recibió ayeri otra marea prieto de menor escala pero que punxo d'actualidá los riesgos del tresporte marítimu. A les 7,13 de la mañana d'ayeri, el cargueru de bandera maltesa "Lydia", construyíu en 1.981 y que carretaba 135.000 tonelaes de mineral de fierru, tuvo un accidente mientres intentaba atracar en puertu d'El Musel (Xixón) cuando ún de los remolcadores qu'ayudaben a entrar en puertu la nave afuracó una plancha del cascu del barcu maltés, abriendo-y tres resquiebres, una d'elles xusto a l'altura de los depósitos de combustible del barcu. De resultes del accidente, el Lydia perdió sobre 60 metros cúbicos de fuel-oil de la clase IFO 380, que ye lo q'usa la máquina del barcu pa poder andar.

Esti volume de fuel fizo una mancha de 800 metros por 300 que tocó la playa de Peñarrubia, onde'l Ministeriu de Fomentu mandó un retén de setenta operarios contrataos pola empresa estatal Tragsa pa retirar el galipote. El dispositivu de seguridá completose cola presencia del remolcador Alonso de Chaves y la lancha de salvamentu Rigel, de Salvamentu Marítimu, ello xunta los remolcadores del puertu Navia y Arbeyal y les lanches de salvamentu Argol de Llanes y Capella de L.luarca. Según datos de Fomentu apurríos pola Delegación del Gobiernu, el fuel del tanque afuracáu trasegose a otros tanques del Lydia, y tan iguándose'l los furacos pa que la nave pueda marchar del puertu n'acabando de descargar. Oficialmente, la mancha quedó baxo control a les 9, pero los llabores de recoyida y control duraron tola tarde d'ayeri y van seguir esta mañana, mientres que va facese per otra parte una investigación pa determinar les responsabilidaes y posibles sanciones


El fuel que perdió'l Lydia ye d'indiz de viscosidá IFO 380, ello ye, la mesma clase que vertió'l Prestige. Esti fuel pa motores de barcu faise con un 10% de gas-oil y un 90% de fuel, y ye, dientro de los combustibles pa maquinaria naval, lomás gordo qu'hai, teniendo falta los barcos de pasalo primero per calor pa que suelte enantes d'echá-ylo al motor. Na semeya, el "Lydia" atracáu y descargando ayeri pela tarde n'El Musel.