Marcos Vallaure: “Nun pasa nada por que’l Niemeyer zarre si val pa que salga reforzáu”

Emilio Marcos Vallaure señaló na Comisión de Cultura y Deporte de la Xunta que “nun pasa nada por que’l Niemeyer zarre si val pa que salga reforzáu”. El conseyeru compadeció a pidimientu del PP pa esplicar la situación del centru cultural.
 
A lo último de la sesión, Vallaure matizó que’l Gobiernu ta pensando en zarrar el centru: “Nun pensamos de nenguna manera en pesllar el Niemeyer", apuntó.Ello ye que Vallaure esplicó que "ye partidariu del consensu y del diálogu" pa desbloquiar la situación qu'enfrenta a los xestores actuales de la Fundación Niemeyer col Gobiernu asturianu. Asina, dixo que ta dispuestu a reunise "les veces que faiga falta", pero mostróse "pesimista” nesi sen.
 
Sobre la manifestación que tuvo llugar ayeri n'Avilés p’apoyar al centru cultural y que reunió a unes 5.000 persones, Vallaure dixo que'l principiu que defende'l Gobiernu en tou esti asuntu ye'l de la tresparencia. "Si eso cuesta dalguna manifestación, qué-y vamos facer; pero espero que'l pueblu d'Avilés acabe valorando'l llabor del Gobiernu pa que'l Niemeyer sía un referente mundial", comentó.
 
Vallaure defende pal Centru Niemeyer un modelu que pasa per una fundación, lo qu'implica'l control de les subvenciones que s'empleguen "del dineru de tolos asturianos". Esa fundación tendrá que ser asina pública na so mayoría. Por último, al respeuto de la proposición non de llei que la Xunta Xeneral aprobó la selmana pasada pidiendo que'l Gobiernu cediere les instalaciones del Niemeyer a la Fundación, Vallaure dixo que la entiende como "orientación" y añadió qu'esa cesión nun va ser nengún problema nel momentu en que se llegue a un alcuerdu. Eso sí, va ser por una llexislatura, yá que cedeles por 50 años paez-y un "disparate" que comprometería a otros gobiernos.
 
El conseyeru tamién llamentó que l'alcaldesa d'Avilés, la socialista Pilar Varela, nun convocara tovía una xunta del patronatu de la Fundación Niemeyer, dalgo que considera necesaria teniendo en cuenta les "graves irregularidaes" detectaes na xestión de les subvenciones, detectaes pol informe provisional de la Intervención Xeneral. Amás, cree qu'hai qu'analizar la situación derivada de los últimos cambios nos estatutos, refugaos pola conseyería.

 
Arestegui acusa al Gobiernu d'imposición
 

Nes intervenciones de la oposición, Emilia Vázquez (IX-LV), que refugó facer entrugues pa non “enllamorgar” l’asuntu, señaló que “toi empezando a duldar de que realmente haya voluntá política de les partes pa llegar a un alcuerdu” y defendió la vía del diálogu. Mentes, el socialista Vicente Herranz mostróse “seguru” de la posibilidá de llegar a un consensu, pero cree que Vallaure nun quier alcontrar puntos d’alcuentru. Por último, el popular Joaquín Arestegui dixo que'l Gobiernu ta faciendo un dañu "irreparable" al Niemeyer nel so empeñu por facese col control "políticu" del mesmu. "Tán dispuestos a zarrar el centru si la direición actual nun se doblega", manifestó, pa después espeta-y al conseyeru "vustedes nun negocien, imponen".