Marcos Rodríguez diseiciona cronolóxicamente’l procesu históricu de la escolarización n’asturianu nel so contestu sociocultural

|
Cubierta ‘El proceso histórico de escolarización de la lengua asturiana, dimensiones políticas y soc

El númberu 9 de la coleición ‘Estaya Sociollingüística’ de l’Academia de la Llingua Asturiana (ALLA) ye ‘El proceso histórico de escolarización de la lengua asturiana: dimensiones políticas y sociales’. Trátase del resultáu de la tesis doctoral de Marcos Rodríguez Álvarez, disponible yá en llibreríes, que considera que’l modelu actual nun garantiza la sobrevivencia del idioma.

Foi nel 1984 cuando entamó la escolarización n’asturianu en 10 centros pilotos depués d’años de demanda, intensificada na década de la 70 col famosu lema ‘Bable nes escueles’. Güei, cuasi 39 años depués, l’asignatura llega a toles escueles y institutos –sacante n’Infantil– pero en competencia con otres materies y nuna situación precaria pa les maestres y maestros al nun contar cola especialidá docente.

Nesti trabayu Rodríguez diseiciona cronolóxicamente’l procesu históricu d'escolarización del asturianu nel so contestu sociocultural. “El testu afítase nun estáu de la cuestión diglósica y nes sos derivaes educatives pa, a lo llargo de cuasi 900 páxines, acabar ufiertando'l que ye, quiciabes, el rellatu historiográficu más fondu y novedosu en datos sobre'l periodu nel que la llingua asturiana pudo, por fin, algamar una escolarización que, según defende Marcos Rodríguez, entá ta llueñe de garantizar la sobrevivencia del idioma”, apunten dende l’ALLA, que ta acabante d’espublizar esti llibru, disponible nel so llar social y nes llibreríes del país.

Contador Estadistiques