Marcelino Laruelo presenta otru llibru sobre la Guerra Civil

"Muertes Paralelas. El destino trágico de los prohombres de la República" ye'l títulu de la obra que va presentar la selmana qu'entra l'investigador Marcelino Laruelo Roa. El responsable de títulos tan interesantes pa conocer la cayida de la República n'Asturies como "El Cervera a la vista" y "La libertad es un bien muy preciado" va presentar esti llibru'l próximu miércoles día 15 a les siete y media de la tarde nel Salón d'Actos de la la Biblioteca Pública Xovellanos de Xixón nun actu pal que se cuenta cola presencia de Ramón Alvargonzález Rodríguez, caderalgu de la Facultá de Xeografía y Historia de la Universidá d'Uviéu.

Marcelino Laruelo ye ún de los investigadores que más datos tan aportando pa conocer meyor los últimos díes de la república y la entrada del franquismu n'Asturies. A mediaos de los 90, laruelo diose a conocer colo llibru "El "Cervera" a la vista" nel que contaba la escapada per mar hasta Francia de milicianos y civiles al esbarrumblar el Frente Norte. Dempués d'esplicar les condiciones en que fuxeron unos, Laruelo fizo un durísimu retratu de la represión sobre los que quedaron equí, asoleyando en 1999 el llibru "La libertad es un bien muy preciado" nel qu'analiza y contrasta tola documentación que pudo atropar sobre los conseyos de guerra que se ficieron en Xixón. Esta tercer obra que va presentase agora cambia la clave de la biografía colectiva poles vides singulares, pero non l'enfoque del autor, que-y presta llamase "papelista" en cuenta d'historiador. El mesmu Laruelo tien esplicao pa referise a esta denominación que "papelista ye una persona que guarda papeles de duldosu valor que dempués, cuando precisa d'ellos, nunca los atopa". Lo cierto ye que Laruelo sí que los atopa y ponlos a disposición del públicu, casu del CD-ROM que venía con "La libertad es un bien muy preciado" y nel que pue consultase una gran base de datos con tolos xuicios sumarísimos que se fixeron nel añu 37 y les condenes que se punxeron. Parte de lños conteníos d'estos dos llibros y bien d'artículos que los complementen puen consultase na web personal de Marcelino Laruelo "Asturias Republicana"