Maragall destitúi a Carod Rovira

Ayeri pela tarde, la crisis en gobiernu catalán daba otru güelpe de dirección cola decisión del presidente catalán Pascual Maragall de destituyir al Conseller en Cap Josep Lluis Carod-Rovira tres de conocese que s'entrevistare con representantes de la banda terrorista ETA.


Anque Carod-Rovira punxo'l cargu a disposición de Maragall, el Presidente nun aceptó de mano la retirada del so segundu nel gobiernu catalán, y foi tres de la esixencia del PSOE a Maragall qu'esti decidió aceptar la dimisión del líder d'Esquerra Republicana, quien, media hora dempués de cesar, daba anuncia de que va encabezar la candidatura d'ERC a les elecciones xenerales del 14 de marzu.

Carod-Rovira tien de presentase agora énte'l Parlamentu de Catalunya pa informar de les sos actividaes "nel mes de xineru" La solicitú d'esta comparecencia presentáronla'l PSC, ICV- EUiA y el propiu partíu de Carod, ERC El gobiernu catalán tien que redefinir tamién agora cuales van ser les competencies de Carod-Rovira, qu'oficialmente ye "conseyeru ensin cartera".

El mesmu Carod nun descarta volver a tener cargu en gobiernu en pasando les elecciones de marzu, y tampoco nun ve que tenga que pidir perdón, nun siendo al gobiernu catalán, nin echase p'atrás polo que fizo. Nuna entrevista que dio ayeri na canal catalana TV 3, Carod defendió los sos principios d'independentismu pacifismu, defensa del diálogu y la llibertá de pensamientu. El políticu catalán ñegó que fuere a la entrevista en coche oficial como afirmaba'l periódicu ABC porque ellí podía ser "independentista, pero non faltosu". Ensin dar más datos sobre'l llugar y condiciones de la entrevista, Carod esplicó que los representantes d'Eta, a los que nun pudo identificar, apurriéron-y un documentu que nun firmó porque nun renunciaba a l'acción armada.

Darréu d'ello, Carod echó pa contra'l Gobiernu español, que yá sabía va tiempu de la entrevista pero que lo asoleyaba agora, a un mes de les elecciones, pa favorecer los intereses del PP, al qu'acusó d'emplegar el terrorismu como arma electoral y d'espurrir innecesariamente la fin de la violencia.

Nesti xuegu d'acusaciones ERC, el partíu de Carod Rovira, ta acabante de meter baza sacando del estoyu de prensa la entrevista del actual portavoz del gobiernu Eduardo Zaplana con representantes de les FARC colombianes, una organización clasificada como "terrorista" pol propiu gobiernu español, la UE y los EEXX.