Mara, el discu más personal de Flavio Benito

Cuantayá que se falaba del discu del gaiteru Flavio Benito que tres un llargu caleyar yá ta na cai.

Esi discu salió fai unes selmanes editáu pola discográfica "Fonofolk", y ye un discu "de gaiteru", que como'l de Diego Pangua, nun ye solo pieces de solista acompañaes pol tambor. La mayoría los cantares lleven guitarres, bouzoukis, xiblates,...etc, d'acompañamientu, iguaes ente'l propiu Flavio y Igor Medio, que foi l'encargáu de grabar la guitarra y el bouzouky. Nes doce pieces mézclense composiciones de Flavio con temes tradicionales como la xota del centru, muñeira de Lliberdón o la rumba d'Ibias. Amas tamién ta presenta la voz de la cantante Ara Costas qu'interpreta una añada y "Dime Xilguerín Parleru". El restu de collaboradores colos que cuntó son xente como Lisardo Prieto col vigulín, Salva López colos teclaos, Daniel Lombas nel bodhrán, Javier Tejedor col curdión...etc. Nesti casu nun topamos la presencia de programaciones que tantu taben poniéndose de moda ente los músicos asturianos, ye un discu domináu por un soníu acústicu llideráu pola gaita. Pero sobre too destaquen el bon gustu nes igües d'Igor y Flavio, y la prestosa téunica qu'amuesa cola gaita Flavio Benito. La producción vieno de la mano d'Igor Medio y el téunicu de soníu foi Paco Loco, resultando un discu interesante pa los aficionaos a la gaita y el soníu folk más acústicu.

Contador Estadistiques