María Begoña de la Roza, direutora-xerente nueva del Serida

María Begoña de la Roza ye la direutora xerente nueva del Servicio Regional de Investigación y Desarrollo Alimentario (Serida) tres la decisión tomada esti martes pol Conseyu Rector del organismu. Sustitúi nel cargu a Koldo Osoro.

La doctora en Bioloxía foi investigadora responsable del Programa y del Llaboratoriu de Nutrición Animal del Serida, asina como del Área de Nutrición, Pastos y Forraxe de la entidá, según informó la Conseyería d’Agroganadería y Recursos Autóctonos. Esta investigadora desempeña la so actividá llaboral nel Serida dende’l 1991. Con anterioridá, trabayó nel Centru d’Esperimentación Agraria (CEA) de la Conseyería de Mediu Rural y Pesca, nel Llaboratoriu de Salú Pública, dependiente de la Conseyería de Sanidá, y na Central Lechera Gijón (LAGISA).

De la Roza pasa asina a ocupar el cargu d’Osoro, doctor en Veterinaria especialista en Producción Animal, que taba al frente del Serida dende’l 2009 tres la entrada d’Aurelio Martín a la conseyería, d’aquella denominada de Mediu Rural y Pesca.