Mapi Quintana y Luis Castañón van recibir el Güestia de Ḷḷena 2013

La Banda Gaites Güestia entrega esti sábadu nel Teatru Vital Aza de La Pola Ḷḷena los sos gallardones añales nun actu que va contar con delles actuaciones musicales. Mapi Quintana y Luis Castañón son los premiaos d’esti añu.

Colos Güestia de Ḷḷena, la banda llocal pretende reconocer el llabor fechu de persones pola cultura del conceyu y del país. Asina, esti añu los gallardones son pa la cantante Mapi Quintana y pa Luis Castañón, deportista de 62 años que fuera futbolista del Lenense y del Caudal y ex téunicu del equipu llocal y d’otros clubes del conceyu, amás d’una persona perimportante nel asocianismu en Ḷḷena. D’igual forma, l’agrupación va nomar miembros honoríficos a David Suárez ‘Cai’, pol so llabor como conceyal de Cultura; a la empresa Fechu n’Asturies, encargada de facer los ‘Güestia’ y les insinies, pola collaboración que tuvo siempre con estos gallardones; y al gaiteru Guzmán González al cumplir 15 años na banda de gaites.

El periodista Álex Boada va encargase de presentar esti actu nel que tamién va haber güecu pa les actuaciones de la Banda Gaites Güestia y de los alumnos de la so escuela de gaita, de Liseo Quiñones y Andresín ‘el d’Insierto’, y de la propia Mapi Quintana. La gala va principiar a les 19.30 hores y la entrada al Teatru Vital Aza va ser llibre.