Mapi Quintana, el jazz tamién tien voz n'Asturies

N'Asturies.com entrevistamos a una de les meyores voces que tenemos nesti país, Mapi Quintana. Con ella falamos de los sos inicios, esperiencies musicales del so interés por facer mezconlanza ente'l jazz y la música tradicional asturiana nos sos últimos proyectos

Dende la Pola L.lena salió al mundu una periteresante voz que garró al jazz como mediu natural. La so evolución técnica y estilística llevóla a estudiar a Holanda onde estudia y fai conciertos cola so banda. Dende ellí, Mapi Quintana tuvo l'amabilidá de contestar a les entrugues d'Asturies.com.

¿Cómo y cuando entamasti a cantar, y por qué apostasti pol jazz como principal estilu?

L.levo enredá cola música dende que mio güela me mando a clases de pianu a los 7 años. Lo de cantar tamién vien dende pequiñina, siempre me paeció mui natural facelo, como muncha xenti que canta. A los 17 años fue la primer vez que canté pa un públicu que nun yeren los de mio casa.
Lo del jazz l.legó cuando entré a estudiar nel Conservatoriu de Xixón nel 96. Entamé a cantar na Big-Band del Conservatoriu y aende coñecí un puñau de buenos músicos que tocaben jazz. Esa música enganchóme dende'l momentu que cayó nes mies manes una grabación de Ella Fitzgerald. Yo quería facer lo que e.l.la: cuntar hestories tan guapes comu les que cunta el.la y pone-y los pelos como escarpies al públicu.


¿Dientro de los distintos estilos nel jazz, en que tipu te sientes más a gusto?

La verdá ye que siempre tuve metía en proyeutos mui diferentes porque gustaríame ser versátil y tar familiarizá lo más que puea con l.linguaxes y estilos que hai na música, porque caún tien dalgo especial. Nun pueo decite de nengún estilu, disfrútolo too. Pero si te pueo dicir que de lo que más me presta ye cantar balaes a dúu con pianu o guitarra.

¿De les llinies que tien el jazz, cuála d'elles crees que ye la más interesante?

Güei tán faciéndose mezcles muy interesantes. La xenti paez que tira peles raíces, pelo que sienten con mas raigañu. O tamién pelo que-yos l.lega d'otres cultures y que lo escuchen comu d'algo puro y honesto. Esto ye lo que más m'interesa nesti momentu: comu la xenti interioriza esos l.linguaxes, améstalos a la so propia personalidá y gustu, y conviértelos en música.

¿Ónde te formasti como cantante, y por qué decidisti tirar pa Holanda pa completar los tos estudios?

La primera formación que tuve como cantante de jazz fue colos músicos que coñecí en Xixón na Big-Band. Con el.los entamé a escuchar y a tocar esta música y tratando d'imitalos, por intuición, fue como entamé a familiarizame co' estilu. Dempués, cuandu me paeció que ya nun podía aprender más yo sola, l.legó'l momentu de salir d'Asturies. Yo diba dir pa Barcelona, pero Dudu Puente, un amigo míu baxista, tardó cinco minutos por teléfonu en convenceme de venir p'Amsterdam al Conservatoriu.

¿Qué te ta aportando la esperiencia nesi país?

Sin neguna duda, a nivel musical toi creciendo muncho. Nun ye solo too la música que toi aprendiendo nel Conservatoriu, ye tamién qu'a Ámsterdam vien xenti de tol mundu y por eso toi espuesta a la influencia d'otres cultures. Esto afeutame tamién comu persona, claro. Ábrete la mente en canal.

D'un tiempu p'acá creció'l to interés pola música tradicional asturiana, ¿cómo naz esi interés?

- Esti Interés naz de echar de menos Asturies en tolos aspeutos: la xenti, l'olor del aire, les montañes, la comía, les romeríes... too.

¿Tuvisti cercana na to infancia a esa tradicional musical asturiana?

De pequeña bail.laba nel grupu "San Antonio" de Muñón y nos "Zamarrones" y per ende conocí la música de los bail.les de la zona de L.lena. Además, vivía al llau la plaza la Pola, onde ponen l'entoldau les Feries, así que tocáronme munchos años de oyír pasacalles de gaita y tambor y xornaes de tonada.
- Daquel.la, nun-y daba muncha importancia; pero eso quedóseme too metío na oreya y agora écholo de menos.


Esi interés del que falamos convertióse nunos cantares nos que faes versiones de temes tradicionales, y una vaqueirada que creo que tien lletra tuya. ¿Qué tal esta esperiencia?

En realidá nun fago versiones de cantares tradicionales. Lo que fago ye componer cantares nuevos a partir de la tradición musical asturiana y el jazz. Toi deprendiendo munchísimo, toi buscando les compatibilidaes ente'l jazz y la nuesa música tradicional. Toi teniendo muncha ayuda d'Ismael Arias, de Mieres, que me regaló discos de tonada y el so llibru de la cronoloxía de la música n'Asturies dende'l sieglu IX. A parte de la so web, de la que tamién toi sacando muncha información. Agora mesmo toi l.leendo' l Cancioneru Torner, que me ta facilitando'l trabayu bastante.
- Personalmenti, esti ye 'l proyeutu nel que toi poniendo lo que me sal de más dientro. Los cantares falen de coses que pasaron o pasan na mio vida, y tán fechos por querer tar un poco más cerca de la mio tierrina y por la necesidá de falar d'el.la. Además la banda ta integrá por 6 persones de 5 países diferentes (Holanda, Alemaña, Arxentina, Corea y Asturies) y caún vien coles sos influencies. Por eso esta banda nuesa ye bastante especial.


¿Qué elementos comunes topes, nel planu estrictamente musical, ente'l jazz y la música tradicional asturiana?

Nun sé de munchos puntos en común, les mios investigaciones nun van per equí de momentu. A lo meyor podría comparase el virtuosismu de les melodíes na época del "be-bop" nel jazz colos "floreos" y les melodíes d'algunos bail.les tocaos cola gaita, por poner algo.

Pa saber más coses d'esti nome que de xuru va dar muncho que falar nel mundu de la música, convidamos a visitar la so páxina web.