Manuel Vega-Arango dimite como presidente del Sporting

|

Tres 21 años na presidencia del Sporting, dividíos en dos etapes, Manuel Vega-Arango arrenuncia al cargu. Antonio Veiga va ser presidente en funciones, pero Javier Fernández, fíu del aicionista máximu, apunta pal relevu.

Alvaré, nome qu’utilizó nos sos tiempos como futbolista del club xixonés, fina la so etapa al frente del Sporting con munches lluces y dalguna solombra. Nos sos primeros años al frente de la entidá, ente 1977 y 1986, el club roxiblancu vivió la so etapa más dorada, al firmar un subcampeonatu de Lliga, dos finales de Copa y delles participaciones na yá desapaecida Copa de la UEFA. El lluanquín tornaría a la presidencia nel 2002, na época más prieta de la historia reciente del Sporting, cuando naidie quería facese coles riendes d’un club al debalu en Segunda División, más cerca del desaniciu que d’otra cosa. L’ascensu na temporada 2007-2008 de la mano de Manuel Preciado tres pasar un procesu concursal dio oxíxenu a los xixoneses, pero’l descensu na campaña pasada y la planificación mala na finalizada recién, xunío a la formación d’una deuda amplia a parte de la deuda concursal, fixo qu’aumentara de manera considerable la presión social énte’l conseyu d’alministración y l’aicionista máximu, José Fernández.

Dada la situación, y tres la entrada nel órganu xestor del club del fíu de Fernández, Vega-Arango fixo pública güei la so decisión d’abandonar el Sporting, lo que dexa a Veiga como presidente en funciones al menos hasta la convocatoria del xunta d’aicionistes, na que Javier Fernández pasará a ocupar el cargu. Sicasí, el Sporting tien previsto ufrir a Vega-Arango la presidencia d’honor del club polos sos 36 años de dedicación a la entidá como futbolista y presidente. La selmana próxima, el lluanquín va dar una rueda de prensa pa esplicar a l’afición los motivos de la so arrenuncia.

Moré y Busto nun van siguir nel Uviéu

L’Uviéu fixo güei pública la llista de futbolistes que nun van formar parte del proyeutu de Carlos Granero p’asaltar l’ascensu a Segunda División. Nin Xavi Moré nin Manu Busto, xugadores clave nes plantiyes últimes del club azul, entren nos planes del téunicu valencianu, que tampoco va contar con Cerrajería, Dani Barrio, Owona, Casares, Fran Sol, Iker Alegre y Javi Cantero.

 

Contador Estadistiques