Manuel Benayas y Nuria Rodríguez sustitúin a Palacios como voceros nacionales del Bloque por Asturies

La xunta nacional del Bloque por Asturies celebrada’l xueves n’Uviéu decidió, amás de nun acudir a les eleiciones del 20-P, una restructuración de la so direición. Manuel Benayas y Nuria Rodríguez garren agora la portavocía de la formación.
 
Según confirmó Benayas a Asturies.com, con esta decisión el Bloque “buscar tener una mayor presencia nel día a día, dalgo fundamental pa dar esi pasu necesariu de consolidación del proyeutu” aniciáu xunto cola Unidá Nacionalista Asturiana (UNA). Asina, el que fora hasta agora voceru del Nalón y candidatu nes eleiciones últimes de Bloque-UNA en Samartín del Rei Aurelio garra la portavocía nacional xunto con Rodríguez en sustitución de Palacios, que dexa la direición pa centrase nos sos estudios. Ésti nun ye’l cambiu únicu qu’alcordóse ayeri n’Uviéu y que permite la entrada de xente nueva na cúpula direutiva, como la candidata del Bloque-UNA en Llaviana, Jana Suárez. Roberto Colunga mantiénse como secretariu xeneral.
 
Asina, la configuración nueva de la direición nacional del Bloque ye la siguiente: Roberto Colunga, secretariu xeneral; Manuel Benayas y Nuria Rodríguez, voceros nacionales; Jana Suárez Morán y Pablo Fernández, responsables d'organización y conceyos; Mónica Montero, responsable de comunicación interna; Xaime Aranda, responsable de movimientos sociales; Lluis Miguel Orviz, responsable d'ayalguería; y Carlos García Villamil, responsable del Bloque de la Mocedá Asturianista.
 
La otra decisión importante que tomó ayeri’l Bloque foi la de nun acudir a les eleiciones del 20-P en solitariu “pa priorizar el procesu entamáu cola UNA”, partíu qu’alcordara nun conceyu abiertu a tola so militancia nun participar nes xenerales. Nesti sen, nun comunicáu, el Bloque llama “a toles fuercies d’izquierdes y soberanistes a trabayar de forma xunitaria pa dar respuesta a les polítiques de graves recortes puestes en marcha pol Gobiernu de PSOE-IX y continuaes pol Gobiernu de FAC”. Na mente de les dos formaciones tán les eleciones nacionales y municipales del 2015.