Mandatu-marcu de RTPA: “Pa que l'asturianu tenga un procesu normalizador afayadizu necesítense conteníos de tou tipu”

Inaciu Galán y David Guardado participaron na segunda sesión de comparecencies informatives na Xunta Xeneral pa la ellaboración del mandatu-marcu de RTPA. Éstes foron les sos intervenciones y respuestes a les entrugues a los voceros parllamentarios.

Foron seis los espertos convidaos polos diferentes grupos parllamentarios los que tomaron la pallabra nesta ocasión, cola única baxa de la periodista Bárbara Alonso Peri.

Amás de Galán y Guardado, que centraron gran parte de la so intervención a la cuestión llingüística, participaron Mario García Bango –de forma telemática–, Carlos Navarro, Julio García Cedrón y Joaquín Rubio, presente por VOX y únicu de los doce participantes na xornada de comparecencies informatives que criticó la presencia del asturianu na RTPA.

“Esti Parllamentu enfréntase al retu de crear un mandatu-marcu pa la radiotelevisión pública asturiana que ta llamáu a condicionar la década viniente de la RTPA”, apuntó a los presentes Galán, qu’afirmó qu’esti documentu “ha ser, como lo ye n’otres corporaciones públiques de comunicación, una ferramienta útil pa marcar los oxetivos polos que se movilicen una cantidá significativa de dineru públicu. Nun ye asumible que la RTPA camine al debalu”.

Darréu espunxo y analizó “los retos cimeros que camiento que tienen d’enfrentar los y les llexisladores a la hora de redactar y aprobar esti mandatu-marcu”. “Los retos como serviciu públicu” foi’l primer puntu a tratar, rescampando que la RTPA “ye un elementu clave pa la sociedá”.

El periodista xixonés analizó la importancia d’avanzar hacia la dixitalización y el multiformatu pa llegar a públicos mozos, la necesidá de contar con un Conseyu d’Informativos “que garantice la independencia de los y les trabayadores y polo tanto un RTPA qu’afale un diálogu abiertu y tolerante na sociedá, promoviendo la diversidá d’idees y opiniones”, o la presencia d’espacios d’alderique y reflexón.

Tamién reclamó que “RTPA ha escoyer la so dirección de la forma más tresparente y democrática posible, abriendo’l procesu a la sociedá y buscando los meyores profesionales posibles.

El segundu puntu centrólu nos “retos como dinamizador de la industria audiovisual”, considerando que la RTPA “ha xugar un papel esencial como dinamizador del sector”. En definitiva, un mediu d’apoyu pa téunicos, creadores, actores y artistes “dende munchos puntos de vista”, dende la exhibición y promoción de los sos trabayos a la financiación de proyeutos.

Preservar y promover la cultura y llingües propies

Pa finar, Galán presentó “los retos como ferramienta de normalización llingüística”. Asina, RTPA “ha tener la voluntá y l’oxetivu claru de preservar y promover la cultura y les llingües propies d’Asturies”, pa lo que punxo l’exemplu del mandatu-marcu de Galicia.

“Asturies ha aspirar a cuntar con un mandatu-marcu ambiciosu na normalización del asturianu, siguiendo les indicaciones de la llexislación vixente”, aseguró l’académicu, qu’insistió con que “la RTPA ha tener como unu de los sos oxetivos cimeros el de convertise nuna ferramienta de divulgación y normalización del asturianu y l’eonaviegu”.

D’igual forma, “ha señalar un camín progresivu pero decidíu nel que l’asturianu seya, nun tiempu razonable, la llingua principal de la RTPA”, una presencia “mayoritaria y tresversal”.

Nesi sen, considera que “ye especialmente importante marcar nel mandatu-marcu porcentaxes progresivos con plazos, dexar bien afitaos que ye clave la presencia del asturianu n’informativos, programación infantil, deportes y entretenimientu”, asina como “la presencia del idioma en tolos ámbitos de la multiplataforma”.

“Un órganu independiente, formáu por espertos, entidaes como l’Academia de la Llingua Asturiana o la Universidá d’Uviéu, habría facer siguimientu y asesorar sobre cuestiones llingüístiques, pa garantizar la calidá d’estos conteníos”, añadió.

Elementu fundamenta pa la tresmisión interxeneracional

Guardado. qu’acudió en representación de ‘Reciella. Families pol Asturianu’, principió afirmando que “RTPA ye o podría ser un elementu fundamental pa la tresmisión interxeneracional del asturianu”.

Asina, l’ente “tien que contar con una programación de calidá n’asturianu que cumpla, como dicía Inaciu Galán, el mandatu estatutariu, tamién constitucional y la Carta Europea de les Llingüés, de la Llei d’Usu que fala de promoción y d’usu, polo que la RTPA debería garantizar l’accesu a la ciudadanía a conteníos na llingua propia en tou tipu de xéneros”.

La esistencia de medios de comunicación con espacios infantiles y familiares, y xuveniles, “ye imprescindible si se quier articular y vertebrar la sociedá asturiana, cumpliendo asina ún de los oxetivos que tienen los medios de comunicación públicos; si los conteníos pa eses franxes fueren n’asturianu ye especialmente necesario pa cumplir otru de los oxetivos, que ye la normalización del asturianu”.

Nesi sen, les esperiencies hasta agora foron “anecdóctiques, o breves, o nun tuvieron inxertaes nuna política xeneral del ente, sinón nuna estratexa de xestos o concesiones dacuando de tipu cosméticu”.

“Tenemos que deprender de les meyores esperiencies y de los casos d’ésitu d’otros llugares, d’otres televisiones, porque nun se trata namás d’ufiertar conteníos n’asturianu, sinón d’iguar una estratexa que permita a esos conteníos competir con una ufierta descomanada de conteníos en castellanu, o n’inglés”, apuntó Guardado, que darréu incidió na “importancia de los medios de comunicación n’asturianu como elementu de socialización y normalización del idioma, non sólo pola programación infantil, sinón pola propia esistencia d’estos medios”.

“Toi falando del empoderamientu simbólicu que trai consigo la presencia d’un idioma como l’asturianu nos medios de comunicación públicu”, porque xenera na comunidá “la perceición de normalidá, de lo que ye normal y lo que ye normativo”.

“Ye más, l’ausencia o arrequexamientu del asturianu en temátiques, franxes horaries, roles o edaes tien un aspeutu na perceición social que pue ser negativu al que son especialmente sensibles les xeneraciones nueves”, siguió’l representante de Reciella, qu’apuntó que “la presencia simbólica del asturianu na TPA, de tou tipu de programes n’asturianu, tien una importancia simbólica pergrande en tol procesu de recuperación y normalización llingüística".

Xenera, según Guardado "un canon, un modelu que valida socialmente l’usu o’l desusu d’un idioma, y que nel casu d’un apueste decidíu por una presencia descomplexada del asturianu, que ye lo qu’esperamos que salga d’esti mandatu-marcu, xenera una percepción de vitalidá en parte suxetiva qu’impulsa’l procesu oxetivu de la normalización y la recuperación llingüística”.

Que la RTPA proponga y lidere

Guardado tamién apuntó que pa “que l’asturianu tenga un procesu de normalización afayadizu, necesítase que la televisión asturiana tenga tou tipu de programación”, esto ye, “conteníos de tou tipu”.

Demandó al respeuto “un plan concretu, con fases, onde s’especifique’l númberu d’hores de programación, franxes horaries, la tresformación interna, la formación y un lideralgu internu dientro de la RTPA.

Nun se pue tratar yá que la RTPA estudie propuestes, sinón que proponga y lidere un procesu guiáu por unos principios ente los que tien que tar la normalización llingüística y pa ello ye necesariu un mecanismu dientro de la propia RTPA de xestión del usu llingüísticu y una dinámica clara qu’asuma la direición de RTPA y tresmita al conxuntu de la organización, pero que los y les trabayadores asuman como propia”.

Como resume, el xixonés rescampló que “la RTPA tien que ser el reflexu d’un modelu d’usu del asturianu y de presencia que tien un consensu mui ampliu yá, polo que’l contratu-marcu tien que reflexar que la RTPA ye una ferramienta fundamental pa llevar a cabu esi procesu de normalización.

Ye imprescindible qu’esistan conteníos de tou tipu y especificamente conteníos infantiles, xuveniles y familiares n’asturianu que compitan nel ecosistema de les plataformes dixitales pa poder acceder a l’audicencia d’eses franxes d’edá”.

Y pa finar, recordó a los presentes la importancia “de la nueva economía de la llingua”. “Asturies tien qu’apostar por eso ensin complexos, y integrase nesi ecosistema del plurillingüismu nel Estáu, porque si non vamos quedar fuera d’un sector y d’unos desarrollos que tienen un gran importancia económica”.

Asturies como centru

Nel turnu d’entrugues, la diputada Cova Tomé, eleuta por Podemos, interesóse pola valoración de Guardado “del compromisu actual cola infancia y la mocedá de RTPA”. “Ye evidente que ye un tramu d’edá totalmente desatendíu”, respondió’l representante de Reciella, qu’apuntó a trabayar nes plataformes dixitales.

A una segunda pregunta sobre la idea de país que debiera tener RTPA, yá de manera personal, Guardado apuntó que “el modelu de televisión debería ser el d’una televisión desacomplexada”. “La televisión asturiana nun tien que ser un reflexu d’Asturies como periferia, sinón como centru”, añadió.

Galán, pela so parte, sobre l’ausencia d’alderiques nel ente públicu de comunicación, declaró que “ye clave que reflexonemos sobre nosotros mesmos y sobre los nuestos problemes na radio pública”. “La televisión tien que cumplir tamién esi oxetivu”, polo que “el mandatu-marcu debería fixar como ún de los oxetivos clave esti fomentu d’un alderique públicu y plural”.

Pautar un modelu correutu d'usu del idioma

Xabel Vegas, de Convocatoria por Asturies, dirixóse tamién a Guardado en referencia al “empoderamientu simbólicu” que citara na so intervención y al usu que se fai del asturianu en RTPA. “La propia RTPA tien que tener un organismu internu de xestión de la so política llingüística” y les pautes que marque’l contratu-marcu “tienen que dir acordies a la política llingüística d’Asturies. Nun pueden ser independientes”, respondió.

Asina, habría que “pautar lo que ye un modelu correutu d’usu del asturianu y tener un mecanismu internu d’evaluación y d’axuste”. D’igual forma, propunxo “un modelu de formación progresivu” de los trabayadores “pa que naide se sienta escluyíu y tol mundu tenga la oportunidá de ver l’usu del asturianu como una cuestión propia qu’ameyora’l modelu televisivu”.

Por último, sobre’l papel xugáu hasta agora pola RTPA pola cohesión territorial, Guardado respondió que “el procesu de vertebración y articulación d’Asturies como coleutivu ye positivu y ye evidente”.

“Asturies arrastra históricamente una percepción provinciana, o de complexu o de lo qu’otros autores llamaríen auto-odiu mazcaráu de complexu de superioridá o’l llamáu grandonismu, que la RTPA en parte nesa corriente pue potenciar, y eso ye una cosa qu’hai correxir y hai cambiar, porque’l futuru de la sociedá asturiana tien que ser el d’una sociedá abierta, moderna; que nun sía 'esi requexu nel norte', sinón 'esi centru que tien que dexar de ser periferia mental'”.

Na imaxe, Galán y Guardado.