Mañana ye Nueche d'Insomniu pa Toli Morilla

Mañana miércoles Toli Morilla va facer el so espectáculu Nueche d'Insomniu nel Teatru Campoamor d'Uviéu. Un oportunidá única pa ver la poesía y la música dende otra perspectiva

Nueche d'Insomniu ye un proyectu vivu, que casi se reinventa pa cada conciertu. Pa l'actuación de mañana miércoles 22 va estrenase, como ye vezu nesta producción, una escenografía pensada y diseñada pal teatru Campoamor. Nesta escenografía vamos tener esta mezcolanza de música y poesía, onde va sirvinos de guía la figura d'un poeta interpretáu pola voz radiofónica de , José Luis San Martín. Esti personaxe va contar una historia na que va amestándose elementos venceyaos intimamente, como la poesía, la filosofía, y como los cantares del discu de Toli Morilla Nueche d'Insomniu.

Esta nueche tamién va ser importante, a parte de pal propiu Morilla, pa la riestra de de poetes y escritores asturianos que van lleer poemes a lo llargo del espectáculu, asina como pal actor José Antonio Lobato, que ye la primer vez que tien que llevar alantre la dirección escénica d'una obra. Otro detalle protagonista del conciertu va ser l'alcordanza del desapaecíu Manfer de la Llera, ya qu'a lo llargo de tol conciertu va haber una butaca vacia alumbrada por un focu, y vamos poder sentir la so voz gracies a les grabaciones feches n'otros conciertos onde participó l'escritor de Ciañu.

Asina Nueche d'Insomniu ye una propuesta onde vienen a xuntase distintos xeitos del arte, y asina puedan sofitase unos nos otros p'apurrinos al final un mensaxe artísticu compactu y coherente. Pa velu namás qu'hai que dir mañana miércoles 22 hasta'l teatru Campoamor d'uviéu a les 20:30 hores. El preciu de la entrada ye de 10 euros.