Mañana entama’l “foru solidariu” en Llangréu

La II edición del Foru Solidariu qu'entama l'Axencia Asturiana de Cooperación al desarrollu entama mañana en Llangréu. A lo llargo de tola selmana van desarrollase debates y meses redondes baxo'l lema "Ensin xusticia nun hai paz - Contra la probitú faesnos falta"

La inauguración formal va ser mañana llunes y nella van tar el director de l'Axencia Asturiana de Cooperación al Desarrollu Rafel Palacios y el so equivalente a nivel estatal Juan Pablo de laiglesia, el Conseyeru de Xusticia Javier Valledor y l'Alcaldesa de Llangréu Esther Díaz. Les ponencies entamen el martes na Casa la Cultura de la Felguera, onde a les 8 va falase de "Oxetivos de Desarrollu pal Mileniu y llucha contra la probitú" cola coordinadora de la campaña "Oxetivos pal mileniu pa Europa" Marina Ponti. El miércoles 8 de xunu l'actividá treslládase a Sama y va dedicase al "comerciu xustu como calce de cooperación al desarrollu" nuna mesa que va moderar la caderalga de derechu Paz d'Andrés y que va contar cola presencia de Carola Reintjes, del Conseyu Internacional del Foru Social Mundial. El 9 de xunu xueves y tamién en La Felguera Ana Falú, directora de la oficina d'UNIFEM pal Brasil y países del conu Sur va falar sobre "Muyer y Probitú".

A la fin, el vienres 10, el foru echa'l piesllu en Ciañu a les 9 de la nueche con un conciertu nel que van participar la cantante de tonada asturiana Anabel Santiago, el grupu de música africana "Kekele" y los españoles "Macaco". Como complementu al foru, ta prevista la esposición "escueles d'otros mundos" del fotógrafu Kim Manresa.