Mal partíu n’El Molinón

L'Eibar vieno ayeri a Xixón cola intención clara de trabase en defensa y aprovechar la velocidá que tien saliendo a la contra pa intentar meter un gol. Enfrente, l'equipu asturianu viose incapaz de torgar el xuegu pesáu del equipu vascu, que demostró como un equipu pue asitiase na parte alta de la tabla si sabe rentabilizar los sos pocos recursos de xuegu.

L'equipu de Marcelino fizo un primer tiempu pa escaecer. Los xugadores del Sporting nun foron a empatar trés pases siguíos a lo llargo d'unos 45 minutos que se ficieron demasiao llargos, llamando l'atención el baxu rindimientu de futbolistes que foron claves en munchos partíos, casu de Borreguero, o, na punta, Omar y Ismael, que tocaron mui pocu balón. Pal segundu tiempu, Marcelino dio-yos entrada de mano a Bauzá y a pablo Álvarez. El Sporting espurrió entós les llinies y fizo unos primeros diez minutos mui d'emponderar, anque d'ello namás saliere en positivo un frayu espectacular de Bauzá que dio na escuadra de la portería del Eibar. El partíu paecía que taba pa entrar nuna fase de dominiu del Sporting, y Marcelino dio-y entrada al brasileñu Arthuro, sacrificando a Omar.

El delanteru cedíu pol Racing de Santander aportó detalles de calidá y dexóse ver en delles xugaes, pero según pasaba'l tiempu'l Sporting diba engurriando, mientres que l'Eibar garraba fuelgu cola entrada de los sos cambeos, acorripiando al Sporting de Xixón y creando delles ocasiones nel área local. Con too y con ello,la intervención del árbitrio, Caballero Herreros, fizo tamién por ayudar al Sporting na so llinia descendente, cortando sistemáticamente'l xuegu del equipu y espulsando al segundu entrenador, Iñaki Tejada. D'otra manera, El Molinón vio la peor entrada del añu (8.500 persones) nun partíu que la directiva declaró Día del Club