Más de cien independientes solicitaron voz y votu pal Conceyu Fundacional de Compromisu

Dos selmanes depués de que s'abriera'l procesu, más de cien independientes apuntáronse nel censu abiertu polos promotores de Compromisu pa participar nel Conceyu Fundacional del 23 de xunu. El día 10 fina'l plazu d'inscripción.
 
La respuesta que ta teniendo esti procesu xunitariu que busca axuntar a la mayor cantidá de xente posible baxo la bandera de la “defensa del país, la xusticia social y l’ecoloxismu” ye valorada de manera mui positiva polos promotores de Compromisu, yá que la mayor parte de les inscripciones al censu s’esperen pa última hora, una vegada constituyíes les xuntes llocales. “La xente valora especialmente que nun faiga falta apuntase a una organización de les que yá existen, y que cualquier persona tenga voz y votu al mesmu nivel, pa construyir ente toos y toes la estructura común que más s'afaye a les necesidaes que nesti momentu existen, y qu'un sector de la sociedá asturiana demanda”, espliquen los promotores. A esti grupu de más de cien independientes apuntaos a Compromisu, tamién hai que sumar la militancia de Bloque por Asturies y d’Unidá Nacionalista Asturiana (UNA) –tamién Asturianistes, por estensión d’UNA–, formaciones impulsores del procesu, que nun tienen falta d’inscribise nel censu pa tener derechu a participar nel Conceyu Fundacional.
 
La selmana qu’entra va principiar l’unvíu de la documentación que va entamar a discutise nes xuntes llocales que tán formándose. "Hasta agora'l trabayu que se ta faciendo ye d'igua d'una base de datos, distribuyendo a la xente per conceyos. Ye un trabayu que nun tien repercusión esterna, pero col que tamos viendo que se ta texendo una rede que pue llegar a munchos conceyos d'Asturies y que ye perimportante pa tener una base social afitada", anuncien dende Compromisu. La xente interesao en formar parte del proyeutu como independiente pue atopar tola información necesaria na web de Compromisu, asina como formalizar la so participación nel Conceyu Fundacional que va celebrase nun sitiu por determinar según les necesidaes d’aforu.