Más de 400 cineastes amenacen con boicotiar el FICXixón si nun se restitúi a Cienfuegos

Tres el manifiestu de sofitu a José Luis Cienfuegos robláu por 31 cineastes asturianos, fixóse públicu un comunicáu nesi mesmu sen cola firma de más de 400 profesionales de tol mundu. Toos amenacen con boicotiar el FICXixón.

El primer documentu, una carta dirixida al conseyeru de Cultura y Deporte, Emilio Marcos Vallaure; y a Carlos Rubiera, conceyal d’Educación, Cultura, Mocedá y Festexos de Xixón, responsable de la decisión de sustituyir a Cienfuegos al frente del Festival Internacional de Cine de Xixón (FICXixón), según confirmó l’alcaldesa Carmen Moriyón nuna entrevista anueche en Canal 10, diose a conocer ayeri. Nella, estes persones venceyaes a la escritura y direición cinematográfica nel país, amosaron la so oposición al cambiu na xestión del certame y, con ello, a la “rotura consiguiente col modelu actual” del festival. Recuerden que foi Cienfuegos el que “consiguió, cola calidá y el rigor na programación como bandera, convertir el FICXixón nun referente cultural pa la ciudá, y d’ésta pal mundo, acoyendo un tipu de cine que cada vegada ye más difícil ver nes pantalles”. Tamién destaquen la oportunidad que-yos brindó’l festival pa formase y pa mostrar los sos trabayos a nivel internacional.

Por esti motivu, anuncien que renuncien a participar na edición próxima del FICXixón, al mesmu tiempu que denuncien “el proyeutu de destrucción al que conduz al certame el nomamientu de Nacho Carballo como direutor del mesmo”. “Los abaxo firmantes anunciamos la nuesa decisión de nun participar nin coles nueses películes nin cola nuesa presencia nes actividaes que s’organicen na celebración de la 50ª edición d’un festival, el de Xixón, al que yá nun vemos como la nuesa casa”, afirmen. D’igual forma, califiquen d’indigno “la utilización partidista que se ta faciendo del ‘cine asturianu’ y d’esi indefiníu ‘toque asturianu’ pa tomar” la decisión de dar el mandu del certame a Carballo, y demanden la creación d’una Direición Xeneral de Política Audiovisual, que se movilice “una partida presupuestaria digna” p’ayudar a la producción y que se potencia a la RTPA si “de verdá tán preocupaos pol desarrollu d’una cinematografía asturiana y una industria audiovisual saneada”.

Los 31 cineastes asturianos que firmaron esta carta foron: Alberto Arce, Luis Argeo, Ramón Lluís Bande, Sofía Castañón, Elisa Cepedal, Arantxa Cuesta, Óscar Fernández, Tom Fernández, Samu Fuentes, Sergio G. Sánchez, Samuel Gutiérrez, José Herrero, Santos Hevia, Iñaki Ibisate, Alejandro López Riesgo, Diego Llorente, José Luis Peñafuente, Pablo Quiroga, Jorge Rivero, Konchi Rodríguez, Aure Roces, Juan Luis Ruiz, Alejo Sabugo, Diego Taboada, Pedro Timón, Juan Tizón, Lucinda Torre, Luis Trapiello, Alberto Vázquez García y Fer Villafina.

Sofitu d’Almodóvar, Trueba y De la Iglesia

Tamién amosaron la so disconformidá cola decisión del equipu del gobiernu municipal de Foro Asturias Ciudadanos (FAC) más de 400 direutores y actores de tol mundu, que roblaron un comunicáu que lleva’l nome de ‘Por la restitución del direutor del Festival de Xixón’. Nés espresen “que la destitución de José Luis Cienfuegos ye una decisión grave y equivocada qu’ha de ser revertida” y faen pública la so decisión “de refugar cualquier tipu de vinculación o collaboración cola direición nueva del festival, a la que nun reconocemos como tal”.

Ente los más de cuatro centenares de firmantes hai nomes tán destacaos como Pedro Almodóvar, Montxo Armendariz, Álex de la Iglesia y Fernando Trueba, amás de reconocíos direutores del cine independiente, responsables d’otros festivales de cine, productores, periodistes y actores como Elena Anaya, Unax Ugalde o Maribel Verdú.