L'Uviéu tien tomada la midida al Sporting

|

Tercer trunfu de Ziganda nos sos trés enfrentamientos col Sporting como téunicu azul.

Un gol de Diegui, al minutu 6 del partíu, bastó-y al Uviéu pa ganar el derbi (0-1) y frayar una dinámica de 7 partíos ensin conocer la victoria. 3 puntos perimportantes pa los uvieínos, que ganen tranquilidá de cara a afrontar el tramu final de la temporada.

Aitor foi'l primeru n'avisar nel choque, pero un centru llateral de Lucas, el sábadu na izquierda, tocólu l'internacional islandés énte la pasividá de Valiente, Mariño y Saúl García. Poníase-y el partíu al Uviéu como quería, conxuntu que defendería con munchu orde'l resultáu hasta'l pitíu final.

Inclusive pudo meter el segundu nunca contra tres un córner, pero Nahuel crució demasiao énte'l porteru gallegu del Sporting. Per parte llocal, posesión estéril, nula creación y dos ocasiones, un tiru de Manu centráu que mandó Femenías a córner y un remate d'Aitor, yá na segunda parte, que sacó nuna maniobra acrobática Arribas, col guardamenta vencíu, cuando paecía que'l balón embocaba puerta.

Al final, allegría ente la plantía azul y la so afición, que tuvo que ver el partíu pela televisión al celebrase, per tercer ocasión, el derbi ensin públicu. El Sporting, entovía en posiciones de puestos d'eliminatories d'ascensu, engancha trés derrotes siguíes nel peor momentu, col Girona –rival próximu del Uviéu'l sábadu nel Tartiere (14 hores, Movistar LaLiga)– acercándose peligrosamente, y con La Romareda esti vienres (21 hores, GOL) como destín próximu. 

Contador Estadistiques