L'Uviéu queda solu na promoción a 2ªB

Unión Popular de Llangréu, Mosconia y Ribeseya quedaron fuera de les eliminatories d'asensu a la segunda división B de fútbol, lo que dexa al Uviéu como únicu equipu asturianu en condiciones de facé-y compañía al Marino de Lluanco na categoría, anque pa ello los carbayones han pasar entovía la eliminatoria col Ávila.

L'Unión Popular de Llangréu teníalo fácil nun principiu, y valía-y con empatar, siempre que fuera con goles, nel campu del Rápido de Bouzas. Sicasí, los llangreanos cayeron por 2-0, un resultáu que los condena a otru añu en tercera. Pela so parte, el Mosconia de Grau cayó ensin perder nengún partíu col Negrerira. Los futbolistes qu'entrena "Pole" empataron a cero en tierres gallegues y quedaron eliminaos pol valor doble de los goles en campu visitante del partíu d'ida, nel que s'empató a uno. P'acabar, el Ribeseya, que tenía qu'entornar un marcador negativu de 3-0 del partíu d'ida, quedó curtiu de resultáu, imponiéndose pola mínima al Lugo n'Oreyana.