L'Uviéu convocará otra ampliación de capital

Va ser de 2.531.872,25 millones d'euros, con una prima d'emisión de 19,25 por aición, lo que podría suponer un ingresu de 4.533.817 euros estra nel casu de completase.

La Xunta Xeneral d'Aicionistes, ordinaria y estraordinaria, de la sociedá va celebrase'l 14 d'avientu (19 hores, Auditoriu) y va incluyir nel orde del día una ampliación de capital nueva col oxetivu de "consolidar la situación financiera actual". Según datos daos pol conseyu d'alministración, el valor del Uviéu ye trés vegaes mayor dende la entrada nel club del Grupo Carso nel 2012.

En total van sacase 235.523 acciones nominativas col mesmu valor que nes ampliaciones anteriores, cola novedá d'incorporar una prima d'emisión de 19,25 euros. D'esta forma, les persones interesaes han d'abonar un total de 30 euros por cada aición.

Nel casu de completase l'ampliación, les arques del Uviéu ingresaríen 7.065.689,25 euros. Los actuales aicionistes tendrán derechu a una aición nueva por cada 6,4744547 de les anteriores.

Ingresu de Carso, por conocer

Entovía nun anunció los sos planes, pero ye casi seguro que'l Grupo Carso, que controla'l 70,76 por cientu de la entidá tres invertir 11.600.000 euros, aumentará'l so pesu na sociedá. Cola ampliación, l'Uviéu podrá aumentar el techu de gastu que marca la LFP a los clubes de cara a la temporada próxima y asina competir colos equipos que baxen de Primera, que cuenten con seguru de descensu, nel casu de nun algamar l'ascensu esta campaña.

Otra manera, l'Uviéu va presentar unes perdes nel exerciciu anterior de 335.740,50 qu'achaca al "nol algame del presupuestu estimáu nes partíes d'ingresos por publicidá y marketing". No que respeuta a la deuda coles Alministraciones Públiques, ésta menguará un 64 por cientu al final d'esti exerciciu, 10.100.000 euros en total, dende'l procesu que comenzó cola llegada de los propietarios mexicanos.