L’Uviéu con menos ataque ganó con autoridá al Caudal

Rivas fizo cambios táuticos y d'homes y l'equipu salió a xugar a otra cosa que nun ye lo que venía faciendo tola temporada nel Tartiere. L'equipu que siempre buscaba banda y verticalidá en toles aiciones camudóse ayeri nun equipu sólidu pero ensin agresividá nin claridá d'idees atacantes.

Sicasí, l'equipu más defensivu de la temporada foi tamién el más efectivu cara a puerta. Rivas optó por un equipu mui sólidu en defensa pero solo con Cervero como referente ofensivu, ensin xuegu per banda y con una llinia centru'l campu que s'atascaba na construcción y nunca nun llegaba n'ayuda del isllote atacante, el partíu yera enforma aburríu y ensin ocasiones de gol. D'esta forma llegóse al minutu 19 nel que Jon Carrera llograba'l primer gol gracies a un gran tiru falta dende fuera del área. Diez minutos dempués d'esti gol, la llucha en banda de Nacho Fradejas y Rubén fizo que'l pelotu-y llegare a Cervero que con gran clase dexó pasar ente les pates pa que-y quedara a placer a J. Carrera qu'otra vuelta mandaba'l balón a la rede caudalista.

Poco más tarde de la media hora, y na única xugada per banda del Uviéu, Yeray sacó un gran centru que Cervero remató impecablemente de cabeza consiguiendo'l 3-0. El partíu paecía resueltu y too ello ensin ver nada de fútbol. El Caudal consiguió un gol nel borde del descansu que podía da-y interés a la segunda parte. Yera'l minutu 43 cuando Falo consiguía un gran gol en tiru direutu de falta, foi la primer y última vez que'l Caudal tiraba a puerta, con esto ta too dicho. La segunda parte foi dafechamente aburrida, dos equipos que paecíen contentos col resultáu y que nun ficieron nada pa camudar el marcador nada más qu'esperar a que l'árbitru pitare'l fin del partíu.

Una xornada más en tercera que-y sirve al Uviéu pa consiguir la clasificación matemática pa la lliguilla d'ascensu y que confirma a Mosconia y Ribesella como acompañantes de los azules, anímase entá más la llucha pola cuarta plaza a la qu'aspiren al menos cinco equipos (Sporting, Llangréu, Avilés, Universidá y Caudal ). Perbaxo, Andés y S. Martín tán en Preferente y Llanes, Navarro y Berrón lluchen por escapar d'esa tercer plaza que va mandar a ún d'ellos pa la categoría inferior