L'Uviéu, campeón de tercera

El 1-2 del Uviéu sobre'l Siero, xunto col empate del Ribesella n'Avilés faen que l'Uviéu asegure'l campeonatu cuando entovía falten tres partíos pa que fine la lliga. Foi un partíu aburríu y con poques ocasiones de gol, munchu xuegu de centrucampu y pocu peles bandes. Pa destacar na primer parte namás hebo que'l gol de Rubén nel minutu 32 , cuando Michu recuperó'l balón nel centru'l campu y tres bona xugada con Aldeondo'l navarru llogró internase nel área y manda-y el pelotu a Rubén qu'acertó a rematar al fondu la portería. Yera'l primer tiru a puerta de los azules y tres elli, l'equipu, que paecía xugar sobráu pero ensin poner munches ganes, dedicóse otra vuelta a veles venir ensin buscar el gol que pudiere decidir el partíu.

El xuegu siguió na mesma llinia na segunda metada, llogrando'l so gol el Siero nel minutu 75, cuando Miguelín recibió un balón esquináu nel área pequeña y consiguió superar la salida de Ponzo. Dempués del gol, l'Uviéu despertó y xugó un fútbol de más calidá y calter ofensivu. Acertó Rivas colos cambios y l'equipu medró'l so poder d'ataque cola entrada en xuegu de Cervero y Xuan González. Foi l'uruguayu'l qu'al minutu d'entrar nel campu fizo'l segundu gol Uvieín que-y daba la victoria y aseguraba'l campeonatu de Tercera. Esti 1-2 vieno na meyor xugada azul del partíu, nun cambiu de xuegu d'Urizar pa Xandru que con gran habilidá y rapidez entró nel área y mandó-y el balón a Juanchi pa que rematara maxistralmente de cabeza al fondu la portería sierense, yera'l minutu 81 del partíu. Sicasí tuvo l'empate'l Siero na postrera xugada del partíu nun remate de cabeza de Miguelín que Ponzo pudo detener na mesma llinia gol.

Partíu ensin ritmu nin ocasiones de gol nel que l'Uviéu consiguió los tres puntos que-y aseguren el campeonatu d'una Tercera división na que la llucha pola cuarta plaza que da drechu a xugar la lliguina ascensu a 2ª B sigue perguapa, con Sporting B y Llangréu a la disputa y dalguna opción pal Universidá. Pela parte baxa paez qu'amás d'Andés y Samartín solo va baxar ún, si ye que'l Marino de Lluanco confirma la so permanencia en 2ªB. Por escapar d'esta plaza lluchen Berrón, Llanes, Navarro y Xixón Industrial.