L'usu del biodiesel estiéndese per Asturies

Los autobuses de la empresa de tresportes del conceyu de Xixón
(EMTUSA), la empresa de tresporte municipal de Mieres EMUTSA, COGERSA y HUNOSA,
tán faciendo prebes col biodiesel que fabrica en Samartín del Rei
Aurelio la empresa Bionorte.

De momentu ye namás un coche de los qu'igüen la flota
municipal d'autobuses de Xixón -Emtusa- el que ta faciendo les prebes
d'esti combustible ecolóxico, que yá usa la flota de la empresa
de llimpieza xixonesa EMULSA y la empresa privada d'autobuses Roces
d'Avilés. L'oxetivu de la preba ye apautar que tantu por cientu de
biodiesel van llevar los coches mecío col gasóleo convencional.
El biodiesel que tan prebando sal too ello de la fábrica que tien en
Samartín del Rei Aurelio la empresa Bionorte, filial del grupu
d'inxeniería Isastur. Amás tamién faciendo estes prebes el
Consorciu pa la Xestión de Residuos Sólidos d'Asturies y la
empresa minera HUNOSA. Dende la dirección de Bionorte aseguren que
tán seguros que'l resultáu d'estes prebes va ser positivu,
yá qu'esti combustible yá tien demostrao la so utilidá
n'otro sitios dende cuantayá. Como preba de la bona acoyida d'esta
combustible ecolóxicu ta que les empreses Alcotán y Casintra
interesáronse yá pol usu del Biodiesel.



Ello ye que'l biodiesel, que se consigue al traviés d'un procesu
de tresesterificación de la grasa vexetal -aceite de cocinar usao
mayormente- anque pue usase puro, suel mecese col gasóleo nun tantu por
cientu variable, ayudando a menguar el consumu, les emisiones contaminantes y
meyorando l'engrase del motor, ello usándolo puro o meciendo'l gasoil
convencional con un pequeñu porcentaxe de biodiesel, que yá
supón una meyora de rendimientu y emisiones mui grande, sobremanera en
flotes de coches que faen mayormente trayectos urbanos, como ye'l casu.



La dificultá d'accesu a la materia prima de la que se fai'l
biodiésel condiciona la pequeña producción que tien pel
momentu la planta asturiana, que nun da pel momentu p'atender a un gran
númberu de clientes, pero amás de les grandes flotes d'autobuses
y camiones, la intención de Bionorte ye popularizar el biodiesel y dalo
a conocer énte'l gran públicu, pa lo que la empresa de la que ye
xerente Fonsu Mielgo ta en tratos con un garapiellu de gasolineres
independientes d'Asturies que podríen entamara servir biodiesel
mecío con gasóleo convencional pa últimos d'añu,
cuando se solucionen les problemes burotcráticos necesarios pa que
Bionorte pueda convertise n'operador, requisitu imprescindible pa poder sirvir
en gasolineres.