L'Urraca estrena'l formatu nuevu de la Copa

Los de Posada viaxen a Becerril de Campos col enfotu de pasar y recibir a un Primera na segunda ronda de la competición.

A les 19 hores l'Urraca va xugar el partíu más importante de la so historia. Va ser en Castilla, nun pueblu de 750 habitantes, énte'l club llocal, el Becerril.

Como campeón de preferente la temporada pasada, l'equipu del oriente tien derechu a participar nesta previa de la Copa, qu'estrena formatu. Ésta enfrenta a los venti equipos de Tercera ascendíos como primeros por proximidá xeográfica, de los que diez, los ganadores, van cruciar na eliminatoria siguiente con un equipu de Primera, a esceición de los cuatro que xueguen la Supercopa n'Arabia Saudí, esto ye, Barcelona, Valencia, Madrid y Atlético, exentos hasta dieciseisavos.

Na primer eliminatoria, prevista pal 18 d'avientu, tamién van entrar el Sporting y l'Uviéu, que van tener como rival un Segunda B y un Tercera. L'oxetivu del Urraca ye la de tar nel sortéu colos dos equipos asturianos de Segunda, pa lo qu'ha de superar nel so campu al Becerril, decimosestu clasificáu nel so grupu con 11 puntos.

Pa esta fazaña nun va tar solu. A Castilla desplácense dos autocares con aficionaos, amás de siguidores que van viaxar nel so vehículu particular.

Na imaxe, aficionaos del Urraca en Posada preparaos pa salir pa Becerril de Campos. Semeya propiedá del Urraca CF.