“L’únicu compromisu ye’l de trabayar como hasta agora pol conceyu, con tresparencia”, afirma García Corte

L’Agrupación Asturianista de Bimenes renovó la mayoría absoluta’l 28-M, aumentando inclusive la so representación al pasar de 6 a 7 ediles. Aitor García Corte va salir escoyíu’l sábadu como alcalde nel Plenu de constitución del Conceyu per tercer llexislatura col compromisu de “trabayar como hasta agora pol conceyu, con tresparencia”.

Si nel 2019 la so candidatura asturianista algamaba un 56,36 por cientu de los votos, nestes eleiciones el porcentaxe aumentó hasta un 62,72 por cientu, un resultáu a toes lluces espectacular. “Tamos mui contentos. Foi una llexislatura mui difícil, había incertidume y nun teníamos mui claro la intención de la xente”, apunta’l primer edil.

“A los meses d’arrancar la llexislatura llegó la pandemia, que foi un golpe social y económicu que lo tumbó too. Llueu, cuando empezábemos a recuperar, llegó la guerra d’Ucrania y l’aumentu de precios. Nel 2020 pagamos 87.000 euros d’allumáu público y nel 2022 la factura foi de 194.000 euros”, añade.

Finalmente, yerbates y yerbatos valoraron “el trabayu, la tresparencia y ser sinceros, nun andar contando boles”, reflexona García Corte, que va contar con 7 de los 9 ediles que componen la corporación. Sicasí, el gobiernu municipal va incorporar una llexislatura más al representante d’Izquierda Xunida (IX), nesti casu Xurde Sánchez Criado, “porque cuanto más xente pa trabayar, meyor. Yá nos apoyaron na primer llexislatura y ye xente lleal y trabayador”.

Los retos

Mañana, a les 19 hores, va celebrase’l Plenu de constitución del Conceyu, al que va ausentase un asturianista por coincidi-y la xornada con una oposición. Cuatro años más de confianza pa una candidatura sensible pa cola llingua y la cultura asturiana que fuxe de “populismos y escentricidaes. Somos realistes, consecuentes y moderaos a la hora de facer polítiques. Gobernamos pa tol mundo”.

Una fórmula que funciona y que va caltenese nesta llexislatura. Sobre los retos pa la mesma, García Corte marca “facer un ameyoramientu de les infraestructures y los servicios”, apuntando darréu que “l'únicu compromisu ye'l de trabayar como hasta agora, buscando lo meyor pal conceyu y con tresparencia”.