Lunasa na nueche folk de Soto d'Ayer

Soto d'Ayer celebra los sos diez años de nueche folk con un
programa bien completu. Rescamplen ente los grupos de la nueche la presencia de
los irlandeses Lunasa.



N'Asturies.com yá podemos adelantar a los nuesos llectores el
cartel de la X Nueche folk Soto d'Ayer del próximu 3 de setiembre. Los
grupos yá dan anucia de la so presencia en Soto al traviés de les
sos páxines web. La principal novedá de la edición
d'anguaño son los irlandeses Lunasa, ún de los grupos de
más nome na escena folk internacional y referente estilísticu pa
munchos grupos asturianos. Ésta va ser la segunda visita de Lunasa a
Asturies, tres de la que ficieron l'añu pasáu al Festival
Intercélticu d'Avilés, onde dexaron mui bon sabor de boca pola so
calidá y simpatía pa col públicu.



Xunto'l folk foriato van tar tamién trés grupos
asturianos. Ello ye qu'ellí vamos poder ver a
Tarañu, grupu del
conceyu d'Ayer que va xugar en casa colos sos siguidores más cerca que
nunca. Llan de Cubel tamién va tar n'Ayer, nuna de les poques
actuaciones del grupu nesti branu nel que los sos fans siguen esperando polo so
esperáu sestu discu. Pieslla esti cartel completu'l folk-rock de
Skanda, banda que vive un añu mui
especial dempués sacar discu -Sangre d'Ochobre- de participar nel
Festival Intercélticu de Lorient, quedar finalistes nel premiu al meyor
cantar n'Asturianu de la SGAE y ganar el premiu al meyor cantar n'asturianu que
convocó Asturies.com. La nueche folk d'Ayer ye tien tamién el so
día, y podemos vivila yá pela tarde participando en toa una
riestra d'actividaes que vamos dir adelantando dende Asturies.com.