Lúnasa, actuación estelar del Intercélticu d'Avilés

Güei sábadu 24 vamos tener la oportunidá de ver
n'Avilés a una de les más reconocíes bandes de folk del
mundu, los irlandeses "Lúnasa".



Ente munchos aficionaos y músicos de folk n'Asturies hai espectación por ver a esti grupu, representantes d'unos
años p'acá de lo meyor del folk acústico irlandés.
Dende'l so primer discu en 1997 el grupu recibió'l preste de la
crítica y el públicu, lo que sirvió p'afitar el so apueste
musical y llegar a los cinco discos que tienen nesti momentu. Los miembros de
"Lúnasa" dexen bien claro, de palabra y cuando toquen,
cuála ye la so influyencia musical principal, que nun ye otra que la mítica banda
irlandesa "The Bothy Band". Con esta referencia "Lúnasa"
interpreta melodíes irlandeses, y d'otres partes del mundu amás de
composiciones siguiendo los cánones del folk acústicu,
rápidu y con una gran calidá técnica colos instrumentos.
Los responsables del soníu de "Lúnasa" son cinco
músicos, Seán Smyth col vigulín, Kevin Crawford na xiblata
, Trevor Hutchinson nel baxu, Donogh Hennessy con guitarra y Cillian Vallely na
uillean pipe y whistles.



Los irlandeses "Lúnasa" nun van tar solos nel
escenariu, a les 23:30 hores van tocar los asturianos "N'Arba" y la
Banda de Gaites Esbardu na Plaza del Conceyu, tocando darréu d'ellos
nel mesmu escenariu'l grupu irlandés.