L’últimu volador de Milio Cueto

Milio Rodríguez Cueto ye ún de los autores asturianos que trabayen más xéneros lliterarios dientro del universu de la prosa. Dende la novela al ensayu pasando pel cuentu y l'artículu, los escritos de Milio Cueto conócense pola especial retranca que gasta l'autor pa tratar los temes más distintos.

Agora, l'autor de "Románticu" y "El velatoriu de Blancañeve" presenta "L'últimu volador" un volume que guarda nes sos 648 páxines el resultáu de la collaboración selmanal del escritor col periódicu "La Nueva España" a lo llargo de los trés años últimos. Esti llibru supón polo tanto una continuación pa los sos siguidores del volume "les razones del calamar" nel que Milio reproduxo les sos collaboraciones con prensa ente los años 1996 y 1999. Si naquella ocasión Milio Cueto presentaba "les razones del calamar como un conxuntu d'escritos "a mediu camín entre l'artículu, l'ensayu d'urxencia y el relatu curtiu caracterizaos por un interés constante por emparentar los asocedíos y les peculiaridaes locales d'Asturies con acontecimientos más xenerales y de presencia internacional, por homologar Asturies col mundu, o'l mundu con Asturies, siempre con espléndidu bañu d'humor" esta segunda entrega de les aventures en prensa del escritor preséntase como un retratu conxuntu nel qu'entren l'Asturies urbana como la rural, el relatu costumista lo mesmo que'l fantásticu, los cuentos sentimentales y los cuentos d'humor, siempre cola pretensión d'esplorar territorios narrativos de los que la lliteratura en llingua asturiana tuvo, tradicionalmente, ausente.

Con ser muncho más llargu que "les razones del calamar" esti "últimu volador" nun reproduz tolo que s'asoleyó en periódicu, faciendo l'autor una esbilla previa na que quedaron fuera los artículos más coyunturales y dexando los que teníen argumentos qu'aguantaren meyor el pasu del tiempu