L’últimu intre, fatal pal Sporting

L'equipu asturianu, que perdiere en casa col Salamanca y empató col Valladolid dempués de dir ganando tol partíu nos minutos del final, perdió ayeri fuera de casa col Tenerife, marcando los canarios nel minutu 42 de la segunda metada, cuando los asturianos contaben con aguantar el puntu nel Heliodoro Rodríguez.

Mui mala traza lleva l'equipu de Xixón nesti primer tramu de la temporada. Dempués de la derrota d'ayeri, el Sporting cañícase a trés puntos de la zona de descensu y sigue con mediu equipu tocáu ente lesionaos y sancionaos. Del grupu de xugadores que taben con cuatro marielles, ayeri foi Neru'l que vio la quinta y nun va poder tar na defensa xixonesa pa esti fin de selmana.

El primer tiempu pasó con más sufrimientu qu'otra cosa pal Sporting, que vio como l'equipu canariu allegábase con relativa facilidá al la portería de Roberto, pero ensin ser a crear peligru. Anque yá nel primer tiempu pudo haber penalti sobre Omar, el marcador nunse movió y lo más interesante del partíu asocedió nel segundu tiempu, col Sporting xugando más adelantáu. Los asturianos buscaben puerta y metíense pel área canaria, creando delles ocasiones de peligru y xugaes pa la moviola al reclamar penalti sobre Ismael.

Al nun ser a pasar la defensa local, los asturianos buscaron les ocasiones a balón paráu, creando Xuan una nueva oportunidá que torgó l'arrebatedor canariu. El xuegu embaruyábase según pasaben los minutos, creándose ocasiones pa los dos equipos. Nesta ruleta la suerte cayó pal llau canariu, nel que dempués de buscar muncho'l gol Kiko Ratón acabó tocándo-y el premiu a Jesús Vázquez, qu'aprovechó un rebote del porteru del Sporting de Xixón pa meter el gol que dexaba los trés puntos en casa