Luis Emilio Cuesta, candidatu a l’alcaldía de la formación MAS Corvera

La formación asturianista de calter llocal MAS Corvera, va presentar como candidatu a l’alcaldía a Luis Emilio Cuesta. ‘Tresparencia, honestidá y participación ciudadana” ye l’eslogan que va utilizar na campaña eleutoral.
 
Luis Emilio Cuesta, vecín de Les Vegues con estudios de Psicoloxía y Electrónica Industrial, foi escoyíu por unanimidá como candidatu d’esta formación nel trescursu del I Congresu de MAS Corvera. Conocíu nel conceyu pola so participación nos movimientos sociales y vecinales, Cuesta pretende siguir un camín similar al tomáu polos ciudadanos de Reus, Sabadell y Marinaleda, puxando por mecanismos de participación ciudadana que permita a la xente de Corvera’l tomar decisiones sobre les inversiones a facer nel conceyu. Por ello, la so campaña va llevar l’eslogan ‘Tresparencia, honestidá y participación ciudadana’. Ente les midíes que propón esta agrupación, ta la realización d’una auditoría de les cuentes municipales.
 
“MAS Corvera, que naz de la xuntanza de vecinos del conceyu, bien podría ser una plataforma vecinal, pero consideramos que la única forma de camudar el panorama políticu llocal d’anguaño ye dándo-yos voz a los vecinos y defendiendo los intereses xenerales de Corvera penriba de los intereses partidistes, personalismos y enfrentamientos continuos ente partes. Por eso presentámonos a les prósimes eleiciones llocales: porque queremos ser decisivos na política de conceyu y facer qu’una nueva xeneración política nueva y de xente mozo tea presente nel conceyu de Corvera”, señaló Cuesta tres ser escoyíu como candidatu de la formación asturianista.
 
Amás de la seleición del candidatu, nel I Congresu de MAS Corvera tamién se nomaron los componentes de la Xunta Executiva, de la Comisión de Garantíes y de la Comisión Eleutoral del partíu.