Luis Arias Argüelles escosa trés ediciones nun mes de la so última novela

L'escritor asturianu consigue un gran éxitu editorial con una novela sobre los años que vinieron darréu de la fin de la Guerra Civil

L'escritor y articulista Luis Arias Argüelles Meres ta consiguiendo un gran éxitu editorial dientro y fuera d'Asturies cola so última novela "parte de postguerra" (ediciones Septem). Esta obra, que se presentare'l pasáu 5 de marzu en Curniana, ta acabante d'escosar les sos trés primeres ediciones, llegando güei a les baldes de les llibreríes la cuarta edición.dereteres d'Asturies y Galicia.

Según el periodista Rafael Torres, que s'encarga de facer el prólogu de la obra ye «una novela filial, lleal y republicana caltriada de sensualidá, de gratitú y del sabor de la tierra". "Parte de Posguerra" constrúyese asina como la crónica d'un tiempu y d'un país que creyó nél mesmu, que vio los sos suños allegase a la realidá y onde, en llegando'l momentu, la luz fízose solombra y l'ecu silencióse. L'estraperlu, la represión, col pesu de los uniformes y les sotanes pasen per esta novela que s'asitia xeográficamente nun requexu d'Asturies al que Franco acude cada añu a pescar acompañáu d'una casposa comitiva ente la que rescampla la figura d'un personaxe real que l'autor llegó a conocer y que foi al mesmu tiempu sacerdote y capitán del exércitu, pero'l retratu social qu'abarca va muncho más allá de los tópicos y tampoco nun escuende les contradicciones d'aquel tiempu, como la esistencia de falanxistes que creyeron na revolución social de José Antonio y que quedaron desencantaos col nuevu réxime.

Luis Arias Argüelles (Salas 1957) ye autor de delles noveles ente les que destaca "Último tren a Cuba" de temática indiana y tien tamién dellos llibros d'ensayu como "La España descabezada" nel qu'analiza'l fenómenu del felipismu y la traición a los sos valores de la xeneración del mayu del 68. Columnista dende va años nel diariu "La Nueva España" un estoyu de los escritos que fexo pa esti diariu pue alcontrase nel llibru "tiempo de Castañas". Fíu de maestru republicanu represaliáu pola dictadura franquista, l'autor nunca guardó les sos preferencies polos ideales y modelu de gobiernu de la república, dedicándo-y otru de los sos ensayos más interesantes "Azaña o el sueño de la razón" a la figura del presidente de la república

.