L'ozonu, un contaminante desconocíu

L'agrupación ecoloxista "Ecoloxistes n'Acción" ta acabante de dar la voz d'alarma sobre la presencia nel occidente d'Asturies d'altos niveles d'ozonu, gas imprescindible nes capes altes de l'atmósfera pa torgar les radiaciones ultravioletes del sol pero dañible pa los humanos.

Según espliquen Ecoloxistes n'Acción, l'ozonu ye un contaminante atmosféricu que se forma a partir de Compuestos Orgánicos Volátiles (COV) y óxidos de nitróxenu (NOX[i]) en presencia de lluz solar. Según los ecoloxistes, esti gas fórmase sobremanera en llugares con gran concentración de tráficu rodáu, pero l'occidente asturianu tien tamién los dos ingredientes precisos pa que se forme allá ozonu en grandes cantidaes. D'una parte,la central térmica del Narcea, asitiada ente Tinéu y Cangas del Narcea, ye un potente emisor d'óxidos de nitróxenu. Asitiada en medio d'una de les mayores mases forestales d'Asturies y na que se da una concentración natural de residuos orgánicos volátiles d'orixe natural, sobremanera ún d'ellos denomináu Isoprenu que se produz na viesca de manera natural y que reacciona colos contaminantes de les térmiques pa crear ozonu.

L'estudiu del grupu conservacionista partió de los datos, altos por demás, d'ozonu que se midieron na estación de control de Cangas del Narcea, que pasó docenes de vegaes, los topes máximos de contaminación por esti gas. Colos sos resultaos, los ecoloxistes quieren llamar l'atención sobre la necesidá d'apautar criterios distintos sobre onde han asitiase les centrales térmiques y condenen qu'Iberdrola quiera poner un grupu nuevu na central del occidente. Según la organización, anque esti grupu fuere de gas, la so presencia diba aumentar los niveles d'ozonu nel occidente asturianu