L’osu pardu, camín de la recuperación n’Asturies

Con más de cien animales según l'últimu censu, la población d'osu pardu nel occidente d'Asturies va camín de recuperase, mientres que la del oriente, que nun pasa de los 30 exemplares, tien más difícil salir alantre y nun se-y ve traza de que tenga viabilidá nun siendo que los dos grupos, l'occidental y l'oriental, llegaren a amestase. Esta ye la conclusión más importante a la que llega la Fundación Osu Pardu nun informe que se presentó na XVI Conferencia internacional sobre l'osu que se celebró n'Italia. L'estudiu llama l'atención sobre'l fechu de qu'amás de presentar un númberu importante d'exemplares, esta colonia d'osos del occidente asturianu col noyu más importante na reserva de Muniel.los tien una tasa de reproducción mui alta, con una tasa más o menos estable del +7,5% añal dende mediaos de los años 90, cuando entornó la gravísima crisis demográfica que tuvo a piques d'acabar cola especie a últimos de la década de los 80.

Con too y con ello, los espertos tienen pa ellos que pa qu'esti animal emblemáticu de la fauna asturiana entovía sufre bien d'amenaces y torgues pa la so supervivencia. La incomunicación ente los grupos oriental y occidental que lleva problemes d'endogamia ye ún d'ellos, pero tamién la mano humana, conseñándose la muerte d'osos por velenu y por trampes. La gran cantidá d'infraestructures que van tarazar la cordelera cantábrica en forma de carreteres, linies d'alta tensión o estaciones d'esquí tamién suponen un problema más al atacar l'habitat de la especie, polo que los técnicos de la Fundación Osu piden midíes qu'aselen l'efectu d'estes acciones sobre'l mediu.