Los xaponeses Harmonic Cream abren los conciertos del Festival Intercélticu d’Avilés

El cuartetu nipón Harmonic Cream va abrir esti llunes los conciertos del Festival Intercélticu d’Avilés cola so propuesta blues con toques celtes. Va ser la primera de les actuaciones d’esti certame que va allargase hasta’l domingu.
 
La novedá principal del festival entamáu pola Asociación Cultura Esbardu ta na celebración de trés conciertos de pagu nes instalaciones del Centru Niemeyer cola presencia d’artistes de sonadía internacional como la bretona Gwennyn (xueves), el gallegu Carlos Núñez xunto al tamién bretón Dan Ar Braz (vienres) y l’escocés Fred Morrison, que va actuar el sábadu nuna xornada na que tamién van tar presentes la banda de Québec, La Bottine Souriante. Xunto a estos eventos de pagu, los avilesinos y visitantes tamién van poder disfrutar tolos díes de baldre de delles actuaciones nel Parque del Muelle que s’abren esta nueche, a partir de les 22.30 hores, cola actuación de los xaponeses Harmonic Cream.
 
Amás, a lo llargo del día, Avilés va acoyer milenta actividaes ente les que destaquen un mercáu artesanu que va tener sede nel Parque del Muelle, actuaciones de bandes de gaites y grupos folclóricos procedentes de delles naciones celtes y talleres agrupaos nel espaciu ‘Ensin pelos na llingua’, ente otros munchos eventos. En total, siete díes de folixa qu’averen a Avilés la cultura d’estos países hermanos.